Wéinst dem massive Stroumausfall a Venezuela, huet d'Nationalversammlung e Méindeg den Noutstand erkläert.

D'Deputéiert hu majoritär fir d'Initiative vum selwer ernannten Interimspresident Juan Guaidó gestëmmt. Bannent 4 Deeg wier een 100 Joer zeréckgeheit ginn, sou de Guaidó. An alles géif drop hindeiten, dass sech d'Situatioun wéinst der Korruptioun an der Ineffizienz vum illegitimme Regimme nach weider verschäerft.

Allerdéngs hunn den Interimspresident an d'Parlament keng faktesch Muecht. De Militär steet bis ewell hannert dem sozialistesche President Nicolas Maduro, deen der Nationalversammlung de Pouvoir ewech geholl huet. Vill Länner gesinn awer am Parlament déi eenzel demokratesch a legitimme Institutioun vum südamerikanesche Kriseland.

Zanter en Donneschdeg lescht Woch gëtt et a wäiten Deeler vu Venezuela kee Stroum méi. D'Reparaturaarbechte kommen nëmme ganz lues virun. D'Oppositioun mécht ënnert anerem Korruptioun an ee falsche Management fir de Stroumausfall responsabel.

De Juan Guaidó huet iwwerdeems um Dënschdeg fir Massendemonstratiounen aus Protest géint déi landeswäit Stroumpanne opgeruff. En Dënschdeg den Owend Lokalzäit soll ganz Venezuela op d'Stroosse goen, sou den Interimspresident e Méindeg virum Parlament.

D'USA hunn donieft annoncéiert, dës Woch de Recht vum Personal aus der amerikanescher Ambassade zu Caracas ofzezéien. Dat huet den Ausseminister Mike Pompeo op Twitter bekannt ginn.