Den algeresche President Abdelaziz Bouteflika trëtt no wochelaange Protester net fir eng 5. Amtszäit un.

Nom Bouteflika senger Annonce, sinn op en neits eng sëlleche Mënschen op d'Stroosse gaangen. Automobilisten hunn net méi opgehale mat tuten, Demonstranten haten den algereschen Nationalfändel bei sech. Donieft war et d'Annonce, dass déi geplangte Presidentschaftswalen vum 18. Abrëll reportéiert ginn.

Dass de Bouteflika nach eemol wollt kandidéieren, hat am ganze Land zu deene gréisste Masseprotester zanter 20 Joer gefouert. Ënnert déi ganz Euphorie hunn sech awer och kritesch Téin gemëscht. Oppositiounspolitiker an Aktivisten hu virun iwwerdriwwener Freed gewarnt a kritiséiert, dass de Bouteflika via Dekret seng Mandatszäit op onbestëmmten Zäit verlängert huet.

Eng national Konferenz soll elo iwwer méiglech Reforme beroden, eng nei Verfassung ausschaffen an een Datum fir déi nächst Presidentielle fixéieren. E Méindeg den Owend huet iwwerdeems den algeresche Premier säi Récktrëtt bekannt ginn. Hie gëtt vum Inneminister vu bis elo ersat.