Leschten Informatiounen no sinn op d'mannst 49 Mënsche bei den Attentater op Moscheeën zu Christchurch ëm d'Liewe komm.

AUDIO: Attentater an Neiséiland: Reportage vum Maxime Gillen

D'Attack op zwou Moscheeën zu Christchurch an Neiséiland gouf vun engem rietsextremen Terrorist aus Australien duerchgefouert. Dat huet den australesche Premier Scott Morrison um Freideg de Moie bekannt ginn. Beim Terrorist géif et sech ëm een australesche Staatsbierger handelen.

Duerch d'Attacken op zwou Moscheeë goufen et vill Doudesaffer. E Policespriecher huet vun enger signifikativer Zuel geschwat, ouni ee konkrete Chiffer ze nennen. Neiséilännesch Medie haten an enger éischter Phas vun op d'mannst 9 Doudegen an Dosende vu Blesséierte geschwat. Aenzeien no wieren ënnert den Doudesaffer och Kanner. D'Premierministesch Jacinda Ardern huet vun op d'mannst 40 Doudesaffer geschwat, dës Zuel ass am Laf vum Freideg de Moien op 49 geklommen. 48 Leit goufe mat Schossverletzungen an d'Spideeler ageliwwert.

De geneeën Oflaf vun der Dot ass och Stonnen dono nach ëmmer onkloer. D'Police geet awer dovun aus, dass et méi wéi een Täter gouf. Op d'mannst 4 suspekt Persoune goufen an tëscht festgeholl, dorënner 3 Männer an eng Fra. Un hiren Autoe wiere Sprengsätz fonnt ginn, déi vun der Arméi entschäerft goufen, sou d'Police.

Ee Mann, deen eng Kugelsécher West an en Helm unhat, huet fir d'éischt an enger Moschee am Zentrum vun der Stad ronderëm sech geschoss. Honnerte vu Moslemen hate sech fir d'Freideggebiet versammelt. Méi spéit sinn och nach Schëss an enger anerer Moschee gefall. D'Leit goufen opgeruff doheem ze bleiwen an den Ament net an eng Moschee ze goen.

Den Täter huet seng Dot wéi et schéint gefilmt an op soziale Medien iwwerdroen. De Video soll 17 Minutten daueren. Aktuell gëtt dru geschafft, dass de Video vun alle Plattforme geholl gëtt. Souwuel de Facebook-, wéi och den Twitteraccount vum Täter goufe gespaart. Hien huet e Manifest geschriwwen, dat un den Anders Breivik erënnert. Hien huet sech heibäi selwer interviewt. Op d'Fro hin, wat hien da wéilt, huet e geäntwert: "Mir mussen d'Existenz vun eisem Vollek sécherstellen an d'Zukunft vun de wäisse Kanner."

Weltwäit huet d'Dot Entsetzen ausgeléist. D'Premierministesch Jacinda Ardern huet d'Attack schaarf veruerteelt an huet an engem kuerze Statement vun engem däischteren Dag an der Geschicht vun hirem Land geschwat.

Christchurch huet ronn 350.000 Awunner a läit un der Ostküst vun der südlecher Insel vu Neiséiland. An Neiséiland gëtt et just eng kleng Minoritéit, déi dem Islam ugehéiert. Alles an allem gëtt ronn 50.000 Moslemen, vill dovu sinn Awanderer aus dem Pakistan oder Bangladesch.

Temoignage

D'Lëtzebuergerin Noemi Gaul (19) ass aktuell zu Christchurch a war nëmmen e puer Honnert Meter nieft enger vun de Moscheeën, an där Leit erschoss goufen.

AUDIO: Lëtzebuergerin Noemi Gaul ass zu Christchurch

.

Reaktiounen

International drécken ëmmer méi Leit hiert Matgefill fir d'Neiséilänner aus. Dorënner och de Premier Xavier Bettel, dee sech op Twitter schockéiert weist a seng Solidaritéit fir d'Neiséilänner ausdréckt. Och de Jean-Claude Juncker erkläert, dass d'Europäesch Unioun sech zesumme mat Neiséiland géint all déi géif stellen, déi eis Gesellschaften a Liewensweise wéilten zerstéieren.