De Policechef Mike Bush sot zu Wellington, dass een dovun ausgeet, dass des fuerchtbar Dot mat 50 Doudegen vun enger eenzeler Persoun duerchgefouert gouf.

Et géife keng Indice ginn, dass den Täter vun iergendengem aneren ënnerstëtzt gouf. Un der Enquête sinn aktuell 200 Beamte bedeelegt, och aus Australien an dem FBI.

Déi neiséilännesch Regierung huet iwwerdeems wéi geplangt d'Initiative lancéiert, d'Waffegesetz ze verschäerfen. D'Regierung koum fir Berodunge beieneen. D'Premierministesch Jacinda Ardern huet annoncéiert, dass di nei Reegelungen sou séier wéi méiglech sollen a Kraaft trieden. Detailer sollen an den nächsten Deeg bekannt gemaach ginn.
Aus Respekt virun den Doudesaffer gouf iwwerdeems déi gréisst Waffefoire an Neiséiland, déi nächste Weekend sollt sinn ofgesot.
An tëscht gouf bekannt, dass dee rietsextremisteschen Attentäter d'Waffen an d'Munitioun am Internet kaaft huet. Hie soll op d'mannst véier Waffe bestallt gehat hunn.

Wéi säin Affekot dann um Méindeg bekannt ginn huet, géif den 28 Joer ale Australier sech selwer viru Geriicht verdeedegen. Hien hätt ze verstoe ginn, dass hie keen Affekot wéilt. Him dreet eng liewenslänglech Prisongsstrof.

Donieft gouf ee Jugendleche vun 18 Joer viru Geriicht ugeklot, well hien de Live-Video vum Attentat am Internet verbreet huet. D'Enquêteuren ginn awer net dovun aus, dass hien direkt eppes mat den Attentater op zwou Moscheeën ze dinn huet.
Vun dësem Méindeg u ginn dann och d'Affer bäigesat. Dräi Deeg no der Dot goufen déi éischt Doudesaffer de Familljen iwwerginn. Am Islam ass et üblech, dass di Doudeg bannent 24 Stonne begruewe ginn. An dësem Fall hunn d'Familljen awer méi laang musse waarden.

31 vun deene 50 Blesséierten leien nach ëmmer an de Spideeler.

Manifest verschéckt

De presuméierten Attentäter vu Christchurch huet säi rietsextreme Manifest kuerz virun der Attack och un d'Premierministesch aus Neiséiland geschéckt.
D'Regierungscheffin huet confirméiert, datt e Mail vum Mann 9 Minutten virum Ufank vun der Attack un hir E-Mail-Adress geschéckt gouf. An der Mail wieren awer keng Plazen oder soss Indicen genannt ginn, mat deenen d'Attacken hätte kënne verhënnert ginn.

© AFP

Alles an allem hätten 30 Persounen dat iwwer 70 Säite laangt Haass-Schreiwes krut. Antëscht geet d'Police dovun aus, datt et sech beim Mann de festgeholl gouf ëm en Eenzeltäter handelt.

Hien hat seng Dot live op Facebook iwwerdroen. Facebook selwer huet matgedeelt, datt si an den éischte 24 Stonnen no der Attack gutt annerhallef Millioun Videoen vun der Dot geläscht hätten.

Zuel vun den Affer geklommen

Bei der Attack op 2 Moscheeën an Néiséiland ass de Bilan vun den Doudesaffer op 50 geklommen. Och d'Zuel vun de Blesséierten ass op 50 geklommen, vun deenen nach 36 am Spidol wieren. Dat huet d'Police e Sonndeg matgedeelt. 2 Persounen wieren an engem kriteschen Zoustand.

E Porte Parole vun der Police huet donieft bekannt ginn, datt zwee Männer, déi e Freideg festgeholl goufen, keen direkte Lien zu der Attack oder dem Attentäter hätten.

Méi e strengt Waffegesetz

No der Terrorattack op 2 Moscheeën an der Stad Christchurch an Neiséiland huet d'Police als Haaptverdächtegen e rietsextremen Australier festgeholl. Zu der Zäit vum Freideggebiet hat hie mat enger Waff op Mënsche geschoss. Seng grujeleg Dot huet hie mat enger Helmkamera gefilmt an d'Biller um Internet iwwerdroen. D'Police huet op der Plaz 41 Läichen gezielt. Kuerz drop goufen an enger anerer Moschee an der Stad weider Mënschen erschoss. Ënnert den Affer, och Kanner.

Den 28 Joer alen Australier, dee fir déi bluddeg Dot responsabel ass, krut vun engem Geriicht Mord reprochéiert. / © AFP

Der Premierministesch no wollt den Mann seng Dot weider féieren, konnt allerdéngs vun der Police a sengem Auto gestoppt ginn. Hien hätt nach 2 weider Waffen am Auto gehat. Donieft goufen 2 weider Persoune festgeholl. Den Haapttäter soll d'Attack an engem Manifest um Internet annoncéiert hunn.

D'Premierministesch vu Neiséiland huet vun Terrorakten geschwat an engem vun den däischtersten Deeg fir d'Land. Si wieren attackéiert ginn, well si fir d'Diversitéit géinge stoen. Si huet versprach, datt d'Waffegesetz geännert a verschäerft géing ginn.

De presuméierten Haapttäter soll wéi et schéngt e Waffeschäin gehat hunn. Hie kritt offiziell Mord reprochéiert.

Regierungen a Reliounsgemeinschafte weltwäit hunn d'Attack veruerteelt. Den US-President Donald Trump huet vun engem béisaartegen Akt vun Haass geschwat a seng Ënnerstëtzung fir Neiséiland ugekënnegt. Den tierkesche Staatschef Erdogan huet d'Attack als Zeechen vun enger zouhuelender Islam-Phobie definéiert. Den tierkeschen Ausseminister huet d'Politiker, och aus der EU fir d'Dot mat responsabel gemaach, wëll si Haass op Mosleme géinge fërderen.

D'Leit an Neiséiland stinn nach ënner Schock. Blumme gi virun der Moschee néiergeluecht. / © AFP