Op e Neits waren zu Paräis Dausende „Gilets Jaunes“ op d'Strooss gaangen. Dat schonns den 18. Samschdeg an der Suite.

Bei der Protestaktioun géint dem President Macron seng Sozialreforme koum et deels zu schwéieren Ausernanersetzunge mat de Force de l'ordre. Ënnert de ronn 10.000 Demonstrante sollen eng 1.500 Ultra-Violents sinn. D'Police huet Waasserwerfer an Tréinegas agesat, fir dës an der Gitt ze halen. Butteker a Restauranten goufen deels komplett futti geschloen, d'Filial vun enger Bank gouf a Brand gesat wouropshin d'Haus uewen driwwer och Feier gefaangen huet. Dobäi goufen 11 Leit blesséiert. Méi wéi 150 Leit sollen och scho festgeholl gi sinn.

A ganz Frankräich sinn eng 14.500 Gilets Jaunes ënnerwee.

Parallel marschéiere ronn 45.000 Manifestanten duerch Paräis, fir dorops opmierksam ze maachen, wéi wéineg géint de Klimawandel ënnerholl gëtt. Weider 350.000 Leit hu sech an 220 franséische Stied zesummefonnt. Ënnert den Demonstrante wieren och vill Famillen a Jonker an hei wier d'Stëmmung nach ëmmer friddlech, melle franséisch Medie vun der Plaz. Eng 140 Organisatiounen haten zu dësem Marsch opgeruff.

Macron annoncéiert Moossnamen

Nodeems et e Samschdeg zu uergen Ausernanersetzunge bei de Protester vun de Gilets jaunes koum huet de franséische President Emmanuel Macron Moossname géint Gewalt-Exzesser ugekënnegt. Via Twitter huet hien d'Leit, déi randaléiert hunn, beschëllegt Doudesfäll a Kaf geholl ze hunn.