Haut virun 30 Joer si 96 Mënschen an engem Fussballstadion ëm d'Liewe komm. Iwwer 25 Joer huet et gedauert, bis de Fall gekläert gouf.

Um 15 Auer sollt de Match zu Sheffield ugoen. D'Stëmmung bei de Fans war gutt, an d'Wieder huet och matgespillt. Fir Konfrontatiounen tëscht Hooligans z'evitéieren, gouf vun den Organisateuren decidéiert, dass d'Fans vun Nottingham op d'Süd an d'Ost Tribün geleet ginn. D'Fans vu Liverpool kruten d'Nord an d'West Tribünen, wou déi sougenannte "Pens" waren: Stéiplazen, déi duerch Drot ënnerdeelt waren. Des "Pens" ware beléift, well se méi bëlleg ware wei Sëtzplazen, an direkt hannert dem Gol positionéiert waren.

Wéinst dem schéine Wieder stoungen déi éischt Fans um 14.20 Auer virum Stadion fir eran. Um 14.40 Auer, also knapps 20 Minutte méi spéit waren et scho ronn 5.000 Fans, déi sech virun den Diere vum Stadion versammelt haten an erawollten. Dëst ass duerch d'Dräikräizer an der Entrée vum Stadion awer nëmme lues virugaangen. Ee Polizist huet dunn iwwer Funk ugefrot, fir de Match méi spéit unzepäifen, sou dass jidderee mat Zäiten dobanne wär, ouni onnéidege Stress. Et ass awer dobäi bliwwen, dass de Match sollt pénktlech lassgoen.

D'Fans virum Stadion goufen ëmmer méi ongedëlleg, sou dass d'Police knapps aacht Minutte virum Upaff decidéiert huet, zwou Sécherheetsparten opzemaachen, fir d'Supporter méi séier eranzeloossen. D'Leit goufen duerch dës zwou Dieren awer direkt an de Pen 3 a 4 geleet, déi zu dem Zäitpunkt scho bal ganz gefëllt waren, woubäi d'Pens 1 an 2 nach praktesch eidel waren.

AUDIO: 30 Joer Hillsborough-Disaster/Reportage Julie Dupont

Punkt 15 Auer ass de Match ugaangen. Fir näischt ze verpassen, hunn d'Liverpool Fans sech begannt a si séier an d'Pens eragaangen. Zu deem Zäitpunkt gouf d'Gedrécks därmoosse schlëmm, datt d'Leit probéiert hunn, erëm erauszekommen. D'Zuschauer hannen hu probéiert, sech no uewen op d'Tribünen ze retten, a goufen och vun de Leit eropgezunn. Déi Supporter fir beim Drot sinn driwwer geklommen an op d'Spillfeld gesprongen, fir esou aus der Mass vu Mënschen erauszekommen. D'Police huet d'Leit awer zréck iwwert den Drot gedréckt, si huet ugeholl d'Spectateure wéilten de Match stéieren, wat zu där Zäit dacks de Fall war.

An der fënnefter Minutt, no engem Late-Schoss vu Liverpool, hunn d'Leit am Pen 4 sech esou no vir gedréckt, dass eng vun den Ënnerdeelungen noginn huet, an d'Leit ënnert sech begruewen huet. Trotz dem Chaos huet d'Police déi zwou Sécherheetsofspärungen net opgemaach. De Goalkeeper vu Liverpool huet spéiderhin erzielt, dass en héieren huet, wéi d'Leit hannert him em Hëllef geruff hunn, wourop hien den Arbitter opmierksam gemaach huet. Kuerz duerno, an der 6. Minutt huet de Superintendent vun der Police erkannt, dass eppes net géif stëmmen, an den Arbitter opgefuerdert, de Match ze stoppen.

Mee d'Katastroph hat schonn hire Laf geholl: 94 Leit waren dout op der Plaz, 766 Leit waren deels schwéier blesséiert. Puer Deeg drop ass eng weider Persoun verstuerwen, dat lescht Affer 1993. Et waren Zeenen, déi kee jeemools vergiess huet.

Famill a Frënn vun Affer / © afp

Och haut nach léisst d'Katastroph vun Hillsborough Liverpool net roueg. Ënnert anerem och dowéinst, well laang d'Schold op d'Behuele vun de Fans gedréckt gouf. Sou huet d'Boulevardzeitung "The Sun" behaapt, Liverpool-Fans hätten d'Affer beklaut an op se urinéiert. Eng komplett Ligen, wéi sech erausgestallt huet, a wat der Zeitung bis haut ee Boykott a praktesch ganz Liverpool bruecht huet. Eréischt 2016 huet ee Geriicht festgehalen, dass d'Schold bei der Police, den Organisateuren, an dem Management vu Sheffield louch, duerch falscht Handelen a schlecht Sécherheetsmesuren. Eng Veruerteelung gouf et awer bis haut nach net.

Margaret Aspinall, Mamm vun engem Affer / © afp

Déi 96 Affer gi vun de Liverpool-Supporter an och de Spiller ni vergiess: op den Trikote vu Liverpool fënnt een dofir 2 Fakelen an d'Ziffer 96, fir un déi Verstuerwen ze denken. Och d'Hymne vu Liverpool, d'Lidd  "You'll never walk alone", huet no dem 15. Abrëll 1989 nach eng aner a vill méi déif Bedeitung kritt, déi kee kal léisst, egal op Futtball-Enthusiast oder net.