D'Regierung mécht radikal-islamesch Organisatioun fir d'Attentater a Kierchen an a Luxus-Hoteller op Ouschtersonndeg responsabel.

Och um Méindeg bleift d'Situatioun a Sri Lanka weider ugespaant. An der Géigend vun der Kierch St. Anthony an der Haaptstad Colombo, wou sech e Sonndeg ee Selbstmordattentäter an d'Luucht gesprengt hat, gouf e Sprengsaz an engem Auto fonnt. Spezial-Unitéiten hunn den Auto gesprengt. Dat huet d'Police matgedeelt. Op enger anerer Plaz goufe bei enger Busgare 87 Zünder fonnt a séchergestallt.

D'Regierung vu Sri Lanka huet eng radikal-islamesch Organisatioun fir d'Attentater op Ouschtersonndeg responsabel gemaach. Rezent hat och schonn d'Police virun Attentatspläng vun deem betraffene Grupp gewarnt. Dësen hat annoncéiert, Selbstmordattentater op Kierchen souwéi déi indesch Ambassade zu Colombo ze maachen. Wéi et iwwerdeems e Méindeg de Moie vum Verdeedegungsministère geheescht huet, géifen d'Attacken op de Kont vu Selbstmordattentäter goen. Dat wier bei den Enquêtë vun deenen eenzelen Explosiounen an dräi Kierchen an dräi Luxushoteller erauskomm. Wat déi zwou aner Explosiounen an engem weideren Hotel souwéi engem Wunnquartier an engem Viruert vun der Haaptstad Colombo uginn, ginn et nach keng Detailer.

Wéi et weider heescht, wieren am Zesummenhang mat den Explosiounen bis elo 24 Persoune festgeholl ginn.

D'Attentater goufe bis e Méindeg de Mëtteg nach net revendiquéiert.

Interpol wäert seng Hëllef fir Sri Lanka verstäerken. Et gëtt eng Ekipp vun Enquêteuren op d'Plaz geschéckt, dat huet déi international Organisatioun vun der Kriminalpolice um Méindeg matgedeelt. D'Krisen-Cellule vun Interpol besteet aus Kriminologen, Demineuren, Spezialisten am Anti-Terrorismus an Experte fir d'Analyse an d'Identifikatioun vun de Affer vu Katastrophen. Dat geet och nach aus dem Schreiwes vun Interpol ervir, déi de Sëtz zu Lyon huet.

Iwwerdeems ass d'Zuel vun den Doudesaffer an tëscht op ronn 290 geklommen. Iwwer 500 Persoune goufe blesséiert. Déi Zuelen huet d'Police e Méindeg de Moie bekannt ginn. Bis ewell louch de Chiffer vun den Doudesaffer bei 207. Ënnert den Affer sinn och eng 35 Auslänner, ënnert hinnen amerikanesch Staatsbierger, Briten, Inder, Hollänner, Portugisen an Tierken.

De Lëtzebuerger Ausseministère ass am Kontakt mat der Ambassade zu Delhi. Bis ewell wiere keng Lëtzebuerger ënnert den Affer, dat huet eis den Ausseminister Jean Asselborn confirméiert.

© AFP

Ënnert den Doudesaffer sinn och dräi Kanner vum dänesche Milliardär Anders Holch Povlsen. Hien ass Chef vum Bestseller-Grupp, zu dem och Marke wéi Vero Moda, Only an Jack&Jones souwéi den Onlinehändler Zalando gehéieren.

Ee Spriecher vum Grupp sot, dass et stëmmt, dass dräi vun de véier Kanner duerch d'Attentater ëm d'Liewe komm wieren. Aus Respekt op d'Privatsphäre vun der Famill goufe keng weider Präzisioune gemaach.

De Povlsen war mat senger Fra a senge véier Kanner op Sri Lanka wéi d'Attentäter hir Bomme gezünt hunn. Dee 46 Joer ale Geschäftsmann war d'lescht Joer op der Lëscht vu Forbes mat engem Verméigen vun ëmgerechent bal 8 Milliarden Euro dee räichsten Dän. Hien hat de Bestseller-Grupp am Alter vun nëmmen 28 Joer vu sengem Papp geierft.

Wat war geschitt?

Terroristesch Attacken a Sri Lanka - Iwwer 200 Doudeger
No den 8 Explosiounen a Sri Lanka huet de Verdeedegungsminister matgedeelt, datt een déi Responsabel fir d'Attacken identifizéiert hätt.

E Sonndeg gouf et am Land op d'mannst 8 Explosiounen. 3 Detonatioune gouf et e Sonndeg de Moie fréi wärend Ouschtermassen a verschiddene Kierchen am Land. Donieft gouf et 3 Explosiounen a verschiddene Luxus-Hoteller an der Haaptstad Colombo. Am spéide Sonndeg de Moie gouf et dunn nach zwou weider Explosiounen.

© AFP

No der Serie vun Attentater huet d'Police e Sonndeg den Owend an der Géigend vum Fluchhafen an der Haaptstad Colombo eng Rouerbomm entschäerft. Wéi et vun der Police heescht, wier dee selwer gebaute Sprengsaz um Bord vun enger Strooss fir bei den Haaptterminal entdeckt ginn. Experten hunn d'Bomm entschäerft.

© AFP

De Regierungschef vu Sri Lanka huet vu feigen Attacke geschwat.

De Wirtschaftsminister, Harsha de Silva, huet op Twitter geschriwwen, da hien an enger Kierch zu Colombo schrecklech Zeenen erlieft hätt. Hien huet dann och dozou opgeruff, roueg ze bleiwen an d'Haiser net ze verloossen.

De President vun der EU-Kommissioun, Jean-Claude Juncker, huet sech op Twitter schockéiert a betraff gewisen an huet de Famillje vun den Affer säi Bäileed ausgeschwat. Weider huet hien nach geschriwwen, datt ee Bereet stéing, fir ze hëllefen.

De Lëtzebuerger Premier, Xavier Bettel, huet säi Bäileed och iwwert déi sozial Netzwierker ausgedréckt a geschriwwen, datt hien a Gedanke bei den Affer ass.

De Statistike vun 2012 no sinn ënnert den 22 Milliounen Awunner vu Sri Lanka 70 Prozent Buddhisten, gutt 12 Prozent Hindus, knapp 10 Prozent Moslemen a gutt 7 Prozent Chrëschten.

De Südasiateschen Inselstaat ass eng beléiften Touristendestinatioun bei Europäer.

Der Kiercheverwaltung NCEASL, déi méi wéi 200 Kierchen an aner chrëschtlech Organisatiounen a Sri Lanka vertrëtt, hat sech kierzlech besuergt doriwwer gewisen, datt et an de leschte Wochen a Méint nees zu méi Iwwergrëff komm wär.

D'lescht Joer gouf et 86 Fäll vun Diskriminéierung, Dreeungen a Gewalt géint Chrëschten an hir Ariichtungen. Dëst Joer waren et der bis ewell 26. Buddhistesch Mënche sollen ëmmer nees versicht hunn, fir chrëschtlech Massen ze stéieren.