An der Ukrain gouf um Sonndeg per Stéchwal den nächste President gewielt. 30 Millioune Leit waren opgeruff, fir hir Stëmm ofzeginn.

No der Victoire vum Komiker Wolodymyr Selenskyj bei de Presidentschaftswalen an der Ukrain, hunn d'EU an d'NATO signaliséiert, an Zukunft gutt wëlle mam neien ukrainesche President zesummenzeschaffen.
Den EU-Conseilspresident Donald Tusk huet e Sonndeg op Twitter geschriwwen, dass d'EU decidéiert wier, d'Land och weiderhin ze ënnerstëtzen. Hien huet vun engem decisiven Dag fir d'Ukrain geschwat. Fräi Walen an ee friddleche Muechtwiessel wieren Zeeche fir eng staark ukrainesch Demokratie. Och den NATO-Generalsekretär Jens Stoltenberg huet dem politeschen Newcomer fir seng Victoire gratuléiert. Et géif een d'Ukrain als Partner schätzen, sou de Stoltenberg.

De Wolodymir Selenksyj hat sech am Ballotage däitlech géint säi Konkurrent, Petro Poroschenko mat ronn 73% vun de Stëmmen duerchgesat. De President vu bis elo, huet e Sonndeg den Owend seng Defaite zouginn an annoncéiert, awer och weiderhin wëlle politesch aktiv ze bleiwen.

Am Hierscht sinn an der Ukrain Parlamentswalen. De Poroschenko kéint sech dee Moment als Oppositiounsleader positionéieren. Dës Wale sinn och fir de Selenksyj decisiv, well hien als President op eng Majoritéit am Parlament ugewisen ass.

Den 41 Joer ale Komiker, dee bis ewell just an enger Comedy-Serie ee President parodéiert hat, huet no senger Walvictoire personell Changementer annoncéiert. Et géifen nei Leit nominéiert ginn, sou de Selenskyj an der Nuecht op e Méindeg zu Kiew. Dee prowestleche Politiker hat am Virfeld scho versprach, déi korrupt Muechtstrukturen am Land ze zerstéieren, ënnert anerem um Niveau vun der Justiz an dem Militär.

© AFP