Ronn annerhallef Woch no der Brandkatastroph vun der Notre-Dame huet de franséische President Macron um Donneschdeg seng Reformpläng presentéiert.

Mat Steierreduktiounen an Entlaaschtungen fir déi Pensionéiert, wëll de franséische President Emmanuel Macron d'Kris, mat där d'Land den Ament konfrontéiert ass, iwwerwannen. Zanter Méint ginn d'Gilets jaunes op d'Stroossen, fir géint dem President seng Reformpläng ze protestéieren.

Gutt 5 Méint nodeems d'Protester ugefaangen hunn an no enger Serie vu Biergerdebatten huet den Emmanuel Macron en Donneschdeg zu Paräis ee Mesurëpak annoncéiert. Hien huet ënnert anerem versprach, dass d'Akommessteier däitlech erofgesat gëtt, dat an Héicht vu ronn 5 Milliarden Euro. Dovu soll virun allem de Mëttelstand profitéieren. Donieft sollen et och Erliichterunge fir Pensionéierter ginn, déi en Akommes vu bis 2.000 Euro de Mount hunn.

Weider huet den Emmanuel Macron drop higewisen, dass ënner Ëmstänn nees eng Verméigenssteier agefouert gëtt. Dës hat seng Regierung gréisstendeels ofgeschaaft. Donieft huet de franséische President annoncéiert, dass déi franséisch Eliteschoul ENA, d'Ecole Nationale d'Administration zougemaach gëtt. Den Emmanuel Macron selwer ass duerch des Schoul gaangen. Des Initiative ass allerdéngs net evident, well och vill aner Regierungsmemberen, dorënner de Premier Edouard Philippe un dëser prestigiéiser Schoul forméiert goufen.

Mat de Reformpläng wëll de President dat soziaalt Klima berouegen an d'Vertrauen nees opbauen.
Aktiviste vun de Gilets jaunes hu sech no dësen Annoncen allerdéngs enttäuscht gewisen an zu neien Demonstratiounen opgeruff. Kritik gouf et och vun der Oppositioun. De Chef vun de biergerlechen Republikaner, Laurent Wauquiez, huet sech gefrot, wéi dem Macron seng Mesure solle finanzéiert ginn.