Béid Länner kënne vun Eenegunge profitéieren. Russland wëll an Dossier Korea eraklammen, Nordkorea brauch no de Gespréicher mat den USA en neie Partner.

Merci, dass Dir komm sidd, sot de Vladimir Putin, wéi hien de Kim Jong Un op der Insel Russki, engem Universitéitscampus an der Hafestad Wladiwostok empfaangen huet.

Béid Männer hu sech fir den Optakt vum Sommet, den ënner héijen Sécherheetsmesure steet, d'Hand ginn. Fir béid Säiten ass dëse Sommet eng Win-Win-Situatioun. Nordkorea sicht en anere Partner, nodeem d'Gespréicher mat den USA an enger Sakgaass gelant sinn a Russland sicht iwwert d'Aussepolitik eng Entrée fir an den Dossier Korea.

Russland hat als alen Alliéierte vu Nordkorea am Kale Krich de Grousspapp Kim Il-Sung un d’Muecht bruecht. Béid Länner verbënnt historesch vill. D’Entrevue mam Putin ass fir de Kim wéi en Equiliber zu de Kontakter zu Beijing a Washington, déi soll gewise kréien, dass een aner Alliéierter huet.

Mä grad wéi China an d’USA huet och Russland keen Intressi drun, dass Nordkorea eng Nuklearmuecht ass. Wat ee wëllt, ass awer op der koreanescher Hallefinsel vun elo un e Wiertche matzeschwätzen.

Méi wéi eng Stonn hu mer ons ausgetosch iwwer wichteg Froen an Themen, déi ons allebéid interesséieren, esou de Kim Jong Un.

Dat Wichtegst ass, dass mer zréckkommen zum internationale Recht. Doriwwer hu mer geschwat. Sou ass dat internationaalt Recht d’Situatioun definéiert an net d’Recht vum méi staarken, sot de Vladimir Putin.

Et gouf keng pompös Ënnerschrëftszeremonie fir d’Kamerae vun der internationaler Press a keng iwwerdriwwe Symbolik. De Sommet war russesch-sober gehalen. Duerfir gouf zesummen e Maufel giess: russesche Borscht mat Rendéier-Kniddelen an engem Glas Schampes.

Ofbau vun Atomprogramm just mat internationale Garantien

Nordkorea brauch Sécherheetsgarantien, wann d'Land säin Atomprogramm ofbaut an de-nukleariséiert. Dat fuerdert de russesche President Wladimir Putin en Donneschdeg de Moien no sengem historeschen Treffe mam nordkoreanesche Leader Kim Jong Un an der ost-russescher Hafestad Vladivostok.

Dobäi mengt de russesche President virun allem international Garantien an huet donieft och nees 6-Parteien-Gespréicher proposéiert. Déi lescht Gespréicher an der Form waren 2009 tëscht Nord-a Südkorea, China, Russland, Japan an den USA.

Russland géing genee wéi d'USA eng komplett De-Nukleariséierung fuerderen. Och Nordkorea selwer wär dofir, awer just mat internationale Garantien.

No hirem éischte Sommet en Donneschdeg, huet den nordkoreanesche Leader Kim Jong Un de russesche President Putin an Nordkorea invitéiert. Wéi et heescht, hätt de Kremlchef des Invitatioun ugeholl.