Zanter annerhallwem Joer regéiert d'Koalitioun ÖVP/FPÖ an Éisträich. E Video aus dem Joer 2017 vum Vizekanzler huet elo fir eng Regierungskris gesuergt.

No der Publikatioun vun engem Video, dat dozou gefouert huet, datt an Éisträich d'Koalitioun opgeléist gëtt, huet ee Spiegel-Redakter, dem däitsche Sender NTV erkläert, datt d'Opnam net bewosst elo just virun den Europawale publique gemaach gouf. Ma et hätt een de Video kritt, an du gekuckt ob en authentesch wier. Soubal dëst feststoung, wier e publizéiert ginn. An der Sequenz, déi verëffentlecht gouf, gesäit een den zeréckgetruedene Chef vun der FPÖ a Vizekanzler Heinz-Christian Strache, wéi deen enger Russin ëffentlech Opträg soll versprach hunn, an als Géigeleeschtung am Walkampf virun 2 Joer Ënnerstëtzung erwaart huet. Dat ganzt soll eng Fal gewiescht sinn, huet et e Samschdeg no der Publikatioun vum Material geheescht.

© AFP

"Genuch ass genuch". Esou huet e Samschdeg den Owend um kuerz virun 20 Auer den éisträichesche Bundeskanzler Sebastian Kurz op d'Ibiza-Affär reagéiert. D'FPÖ géif dem Reformprojet an Éisträich schueden. Hien hätt elo e puer Optioune, wéi et politesch sollt weider goen. A sengen An sollten dat virgezunne Neiwale sinn, esou de Sebastian Kurz.

Wéini dës Walen allerdéngs kéinten ofgehale ginn, doriwwer huet de jonke Kanzler näischt gesot, just datt se esou séier wéi méiglech sollte sinn. Dofir huet hien um Sonndeg de Bundespresident Alexander Van der Bellen consultéiert.

De Bundespresident huet um Sonndeg de Mëtteg an enger Pressekonferenz wësse gedoen, dass d'Neiwale fir de September ugesat sinn.

Ob d'FPÖ bis bei d'Neiwalen an der Regierung sëtze bleift oder net, an wien den Heinz-Christian Strache soll ersetzen ass aktuell net gewosst.

Reaktioun vum Lëtzebuerger Ausseminister Jean Asselborn

Wat an Éisträich grad geschitt schwätzt am Prinzip fir eng Demokratie. Wann eng Regierung ee Feeler mécht, esou ee graven wéi hei, da fält se. Fir déi déi mat de Rietspopulisten eng Verbindung aginn, misst dat heiten eng Léier sinn, seet de Lëtzebuerger Ausseminister Jean Asselborn. D'Rietspopuliste géife sech selwer demontéieren an demaskéieren, an dat kéint sech och op d'Europawalen auswierken. An enger Woch ginn d'Europäer een neit Europaparlament wielen. An dat, wat grad an Éisträich ofleeft, géifen all d'Europäer matkréien. Hien huet dann och nach emol en Appell u jiddereen gemaach, dass et wichteg wier wielen ze goen.

AUDIO: De kompletten Interview mam Jean Asselborn