Kee weess et den Ament, och net nom Statement vum Bundeskanzler Sebastian Kurz e Méindeg an der Mëttesstonn.

Hien huet net preziséiert, wat elo déi nächst Schrëtt sinn.

D'FPÖ wär weider net bereet, fir de Skandal opzeschaffen, sou de Kurz,

Hien huet näischt derzou gesot, ob hie wéilt den Inneminister Kickl erausgeheien, sou wéi dat gemellt gi war. Alles bleift vague.

Wann den Inneminister Kickl muss goen, wëllen all d'FPÖ-Ministeren d'Regierung verloossen. Dat hat den designéierten FPÖ-Chef Norbert Hofer scho virdrun annoncéiert.

Ibiza-Video

D'Enquêtë géifen elo weisen, wat geschitt, sou de Sebastian Kurz géintiwwer der Bild-Zeitung. De Contenu vum Video wier ganz grav, well den Heinz-Christian Strache sech oppen zur Korruptioun bekannt an Attacke géint déi fräi Press gemaach hätt. Dat géif d'Enn vum Strache senge politeschen Aktivitéiten a wahrscheinlech och strofrechtlech Konsequenze bedeiten, sou de Bundeskanzler.

De Skandal war duerch ee Video opgeflunn, deen heemlech opgeholl gi war an, an deem sech de fréiere Vizekanzler virun de Parlamentswalen 2017 bereet erkläert huet, als Géigeleeschtung fir illegal Walkampfspenden, ëffentlech Opträg un d'Niess vun engem russeschen Oligarch ze verginn.