Et si sougenannt Experten, héich Beamten, déi d'FPÖ-Ministeren ersetzen, déi jo zréckgetruede sinn.

Dat nodeems de Kanzler Kurz den FPÖ-Inneminister Kickl erausgehäit huet. Just d'Ausseministesch Kneissl, déi der FPÖ no steet, ass weider an der Regierung. Neien Inneminister gëtt elo de fréiere President vum Ieweschte Geriichtshaff. Nei Verkéiersministesch gëtt d'Cheffin vun der Fluchsécherung. A Verdeedegungsminister de Vize-Etat-Major.

Déi nei Ekipp regéiert elo d'Land bis déi nächst Walen. Dat gouf et bis ewell nach net an Éisträich.

E Méindeg muss de Kanzler Sebastian Kurz sech engem Mësstrauensvott am Parlament stellen. Wann en deen net iwwersteet, muss en zrécktrieden.

Egal wéi annoncéiert sech an Éisträich e brutale Walkampf, soen déi politesch Experten.

Bundespresident huet viru Politikverdrossenheet gewarnt

Den éisträichesche Bundespresident Alexander Van der Bellen huet en Dënschdeg probéiert, dem éisträichesche Vollek Courage ze maachen.

D'Land stécht den Ament an enger déiwer Regierungskris. Hien huet wärend enger Usprooch en Dënschdeg Owend viru Politikverdrossenheet gewarnt. De Bundespresident huet sech awer och fir d'Bild entschëllegt, dat d'Politik elo grad hannerlooss hätt.

Mat Bléck op déi nächst Deeg huet den Alexander Van der Bellen op en neits un déi staatspolitesch Responsabilitéit vun de Politiker a Parteie vum Land appelléiert. Si sollten net drun denken wat si kuerzfristeg fir sech selwer kéinten eraushuelen, mä si missten drun denken, wat si fir Éisträich kéinte maachen.

D'Land stécht zanter der Publikatioun vun engem skandaléise Video aus dem Joer 2017, duerch de Spiegel an d'Süddeutsche Zeitung, an enger schwéierer Regierungskris. An tëscht sinn d'FPÖ-Minister kollektiv aus der Regierung zeréckgetrueden. Donieft kéint de Kanzler Sebastian Kurz, nächste Méindeg duerch ee Mësstrauensvotte am Parlament, säi Poste verléieren.