Hannergrond vum Opstocke vun den Truppen an der Regioun sinn d'Spannungen, déi sech ëmmer weider tëscht den USA an dem Iran verschäerfen.

Déi supplementäre Männer a Fraen an Uniform solle haaptsächlech "schützend" Aufgaben iwwerhuelen, huet den US-President annoncéiert. Aktuell huet d'USA am Noen a Mëttleren Osten tëscht 60.000 an 80.000 Zaldote stationéiert.

Fir sech géint déi, wéi hie seet, "iranesch Aggressioun" ze protegéieren, huet den US-Ausseminister d'Waffegeschäfter mat Länner am Noen Osten justifiéiert. D'Regierung vum US-President Trump huet laanscht de Kongress Waffegeschäfter a Milliardenhéicht un Alliéierter am Noen Osten decidéiert. Mat de Liwwerunge fir 8,1 Milliarden Dollar sollte Saudi-Arabien, d'Vereenegt Arabesch Emiraten a Jordanien dobäi ënnerstëtzt ginn, fir sech géint déi iranesch Regressioun ze schützen, sou de Mike Pompeo.

Kongressdeputéiert hu schockéiert op dës Decisioun reagéiert. Si fäerten, dass d'Waffen am Jemen kéinten agesat ginn. Den Ausseminister huet iwwerdeems verséchert, dass duerch dës Waffeverkeef d'Stabilitéit am Noen Osten erhéicht gëtt. D'Regierung géif déi néideg Iwwerpréiwung vum Kongress vun deenen 22 Transaktiounen ëmgoen, fir sou ze garantéieren, dass déi arabesch Partner séier kënne reagéieren.