Déi 20 gréissten Industrie- a Schwellelänner wëllen sech op gemeinsam Reegelen eenegen, fir multinational Entreprisen ze besteieren.

Doriwwer diskutéieren d'Finanzminister vun deenen 20 Länner a Japan. Et soll an Zukunft verhënnert ginn, dass Konzerner wéi Facebook, Google oder Amazon vu Gesetzeslücke profitéieren, fir manner Steieren ze bezuelen. Laut Estimatioune vun der OECD géifen de Länner iwwert dee Wee eng 220 Milliarden Euro u Steieren entgoen.

Iwwerdeems hu sech déi 20 Staaten op e gemeinsame Kader fir den Ëmgang mat kënschtlecher Intelligenz gëeenegt. Wien artifiziell Intelligenz géif asetzen, misst rechtlech Grondsätz, Mënscherechter an demokratesch Wäerter respektéieren, heescht et an enger gemeinsamer Deklaratioun.

Sou laang wéi KI-Systemer benotzt ginn, missten dës robust, geséchert a sécher sinn an dierfte keen onzoumuttbare Sécherheetsrisiko sinn.