Den däitschen Ausseminister war e Sonndeg fir seng Visitt am Iran, fir Beweegung an de Sträit iwwer d'Atomofkommes ze bréngen.

D'Atomofkommes mat Teheran huet der Meenung vum däitschen Ausseminister Heiko Maas no just eng Zukunft, wann sech déi eenzel Säiten un hir Engagementer halen. Dat sot den Heiko Maas e Méindeg den Owend no sengem Retour aus dem Iran an den ARD-Tagesthemen. Dat wier gutt fir d'Sécherheet, virun allem fir d'Leit an Europa.

Hien hätt wärend senge Gespréicher zu Teheran nach eemol kloer an däitlech gesot, dass Däitschland an déi ganz EU hannert dem Accord stinn. Et géif een allerdéngs erwaarden, dass och den Iran sengen Engagementer nokënnt, sou den däitschen Diplomatiechef. Teheran dierft dofir net méi Uran uräicheren, wéi am Atomofkommes festgehalen ass. Den däitschen Ausseminister koum e Méindeg fir Gespréicher mat sengem iraneschen Homolog an dem iranesche President Hassan Ruhani beieneen. Hien huet virun enger Eskalatioun vun de Spannungen an der Regioun gewarnt. Dës haten sech am Laf vun de leschte Wochen dramatesch verschäerft.

Den amerikanesche President Donald Trump hat jo matgedeelt, dass hie wéilt aus dem Deal erausklammen. D'Europäer hirersäits géingen awer nach ëmmer hannert dem Accord stoen, deen d'EU zesumme mat den USA an dem Iran ausgehandelt haten. Dofir huet den Iran rezent domadder gedreet, sech dann och net méi u veschidden Demanden, déi am Accord festgeluecht gi waren, ze halen.

Déi iranesch Regierung veruerteelt de „Wirtschaftskrich“, deen d'USA den Ament géint hiert d'Land géif féieren an huet bei enger Konferenz e Méindeg erkläert, dass déi di dëse Krich ugestiwwelt hätten net kéinten domat rechnen, sécher ze bleiwen.