Den 18 Joer ale Chauffeur vum Auto huet missen aus dem Gefier erausgeschnidde ginn a gouf schwéier blesséiert.

An den Accident e Mëttwoch géint 16.30 Auer op der B49 direkt hannert der Lëtzebuerger Grenz tëscht Igel a Waasserbëlleger-Bréck waren eng Camionnette mat Lëtzebuerger Placken an een Auto verwéckelt.

Aus bis ewell ongekläerter Ursaach war den Auto vum 18 Joer ale Chauffer, deen an Direktioun Grenz ënnerwee war, op d'Géigespur geroden. Do huet en den Unhänger vun engem aneren Auto gesträift an ass dunn an eng Camionnette, déi an Direktioun Igel gefuer ass, gerannt.

De Chauffeur vum Auto gouf beim Accident schwéier blesséiert an huet missen aus sengem Gefier erausgeschnidde ginn. An der Camionnette goufe zwou Persoune méi liicht blesséiert.

D'B49 war ronn 3 Stonne laang gespaart.