Am Alter vu 67 Joer ass e Méindeg de fréiere President vun Ägypten am Spidol gestuerwen, nodeem hien am Geriichtssall zesummegaange war.

De fréieren ägyptesche President Mohammed Mursi ass um Dënschdeg begruewe ginn, op engem Kierfecht vun de Muslimbridder zu Kairo.

De 67 Joer ale Politiker war e Méindeg wärend enger Geriichtsverhandlung zesummegebrach a gestuerwen. Staatlech Medie mellen, datt de Mohammed Mursi d'Affer vun engem Häerzinfarkt gouf. Dat gouf bis ewell net offiziell confirméiert. De Parquet huet eng Ënnersichung ordonnéiert.

Mënscherechtler maache schlecht Haftkonditioune fir den Doud vum Politiker responsabel. D'Muslimbridder reprochéieren den ägypteschen Autoritéiten, datt se mat Absicht fir e luesen Doud vum Mohammed Mursi gesuergt hätten.

De Mursi war 2012 den éischte fräi gewielte President vum Land ginn, dat no den Demonstratioune vum "arabesche Fréijoer". E Joer no der Wiel ass hien duerch de Militärputsch gestierzt a verhaft ginn. Hie gouf vun engem Geriicht zum Dout veruerteelt.

Um Méindeg hat hien eng Unhéierung viru Geriicht, wärend där hie kollabéiert a gestuerwen ass. Dobäi ass et em méigleche Spionage gaangen.