A Groussbritannien war et um Dënschdeg d'Suite vun der Walprozedur fir een neie Parteichef vun den Tories.

Bei der zweeter Ofstëmmung bei de briteschen Tories läit den Ex-Ausseminister Boris Johnson kloer vir. Vun den 313 Deputéiert hunn der 126 fir hie gestëmmt.

Fir de Brexit-Hardliner Dominic Raab ass d'Course ëm de Posten als Premier eriwwer. Domat bleift de Favorit am Kampf ëm d'Nofolleg vun der britescher Premierministesch Theresa May.

105 Stëmme sinn néideg, fir den 22. Juli als ee vun 2 Kandidaten un der Schluss-Wal kënnen unzetrieden. Den neie Parteichef gëtt dann och neie Minister.

Am éischte Waltour hate sech 114 Deputéiert fir hien ausgeschwat. Den aktuellen Ausseminister Jeremy Hunt koum op 43 Stëmmen an den Ëmweltminister Michael Gove op 37.

Um Mëttwoch steet den nächste Waltour un. Mat engem Resultat gëtt am Laf vum Owend gerechent. En Donneschdeg da soll d'Zuel vun de Kandidaten op zwee limitéiert ginn. Spéitstens en Donneschdeg den Owend soll feststoen, wien déi lescht zwee Kandidate sinn. Wie vun hinne Parteichef an domat Premierminister gëtt, sollen dann déi ronn 160.000 Parteimember decidéieren.

Brexit bis den 31. Oktober

De fréiere briteschen Ausseminister a Favorit fir de Poste vum Premierminister, Boris Johnson, wëll dass Groussbritannien d'EU bis den 31. Oktober verlooss huet. Wärend engem Televisiounsduell mat deenen anere Kandidaten, en Dënschdeg den Owend op der britescher Tëlee, sot de Boris Johnson, dass am anere Fall mat engem katastrophale Verloscht vu Vertrauen an d'Politik ze rechne wier. Op d'Fro wie kéint garantéieren, dass Groussbritannien op den 31. Oktober aus der EU austrëtt, konnten awer weder de Boris Johnson nach ee vu senge 4 Rivalen eng Äntwert ginn.