Een Äerdbiewen an der südwestchinesescher Provënz Sichuan huet op d'mannst 12 Mënsche mat an den Doud gerappt.

Iwwer 134 Persoune goufen engem éischte Bilan no blesséiert. Dat mellen déi staatlech Medien. D'Biewen hat eng Stäerkt vu 6.0 op der Richterskala a louch op enger Déift vu 16 Kilometer. Duerno gouf et nach eng Rëtsch Nobiewen vu bis zu 5,1.

D'Leit sinn a Panik op d'Stroosse gelaf. Haiser sinn an ee Koup gefall. Déi zoustänneg Autoritéiten hunn direkt gehandelt an hunn iwwer 5.000 Zelter, 10.000 Feldbetter an 20.000 Decken an déi betraffe Regioun geschéckt.

Staarke Reen huet d'Rettungsaarbechten an der Regioun immens schwéier gemaach. Iwwer 500 Pompjeeë waren am Asaz. 7 Leit konnte lieweg aus Gebaier gebuerge ginn

Äerdbiewe kommen zu Sichuan heefeg vir. 2008 huet de Buedem do mat enger Stäerkt vun 7,9 op der Richterskala gewackelt. 87.000 Mënsche koumen deemools ëm d'Liewen oder gëllen als vermësst.