D'Majoritéit am Nationalrot huet dofir gestëmmt, fir dat ëmstriddenen Onkrautvernichtungsmëttel komplett ze verbidden.

Éisträich huet als éischt Land an der EU ee komplett Verbuet vum Herbizid Glyphosat decidéiert. Eng Majoritéit vum Nationalrot huet en Dënschdeg fir den entspriechende Gesetzprojet vun der sozialdemokratescher SPÖ gestëmmt. Déi konservativ ÖVP huet géint des Initiative gestëmmt, well se aus hirer Siicht den éisträichesche Bauere géif schueden. Si huet am Géigenzuch proposéiert, Glyphosat am Privatgebrauch an an der Géigend vu Schoulen a Sportsinfrastrukturen ze verbidden. Kritiker soen, dass des Initiative net kompatibel ass mam EU-Recht. D'EU huet den Asaz vum Herbizid nach bis de 15. Dezember 2022 erlaabt. An der Fuerschung ass d'Fro, ob Glyphosat kriibserreegend ass, ëmstridden.