Kuerz virun 15 Auer en Dënschdeg am Nomëtteg koum d'Nouvelle, datt de franséische Minister François de Rugy seng Demissioun deposéiert huet.

Den Ëmweltminister war an d'Kräizfeier vun der Kritik geroden, well hie sech, a senger Zäit als President vun der "Assemblée générale" mat ëffentleche Gelder deier privat Iesse bezuele gelooss huet an eng iwwerdriwwe Renovatioun vun enger Déngschtwunneng soll finanzéiert hunn.

Wéi den Elysée en Dënschdeg den Owend zu Paräis matgedeelt huet, iwwerhëlt d'Transportministesch Elisabeth Borne de Posten. Wéi franséisch Medie mellen, géif si awer och Transportministesch bleiwen. De François de Rugy war no gutt 10 Méint als Ëmweltminister iwwert déi sougenannten "Homard-Affär" gefall. En Dënschdeg huet hie säi Récktrëtt agereecht.

De fréiere President vun der franséischer Assemblée Nationale soll op Staatskäschte grouss Soiréeën organiséiert a seng Wunneng renovéiere gelooss hunn. Hie selwer streit dës Virwërf of a gesäit sech als Affer vun enger medialer Lynch-Justiz, wéi hie seet.