D'Fär war am September 1994 um Wee vun Tallin op Stockholm bei stiermescher Séi ënnergaangen. 850 Leit waren ëm d'Liewe komm.

Bal 25 Joer nom Ongléck vun der Ostsee-Fär "Estonia", mat iwwer 850 Doudegen, gouf e Freiden d'Uerteel géint déi däitsch Werft, déi d'Schëff gebaut hat, bekannt. Dat franséischt Geriicht zu Nanterre huet d'Uspréch op eng weider Entschiedegung zeréckgewisen.

Déi deemoleg schwedesch-estesch Reederei EstLine hat nom Ongléck 130 Milliounen Euro Entschiedegung bezuelt.

Iwwer Dausend Iwwerliewender a Familljemembere vun Affer haten elo vun där betraffener Werft, an engem franséischen Expertebüro, nch eng Kéier iwwer 40 Milliounen Euro Schuedenersatz gefuerdert. Den Ënnergang vun der Estonia gëllt als déi gréisste Schëffskatastroph vun der Nokrichszäit.
 
D'Fär war am September 1994 um Wee vun Tallin op Stockholm bei stiermescher Séi ënnergaangen, nodeems Waasser duerch déi viischt Klapp an d'Schëff era gelaf war. Bannent Minutte war d'Fär deemools ënnergaangen an huet 852 Mënsche mat an den Doud gerappt. Ënnert den Affer ware 500 Schweden an iwwer 284 Esten.

Iwwert d'Ursaach vun der Katastroph gouf jorelaang enquêtéiert. Wahrscheinlech war déi viischt Klapp vum Schëff, där hir Scharnéieren net gehalen hunn, de Grond dofir dass d'Schëff ënnergaangen ass. Ee Verantwortlechen oder Schëllege gouf ni festgehalen.