Iwwer 1.700 Pompjeeë sinn de Moment a Portugal domadder beschäftegt gréisser Bëschbränn ze läschen.

De Weekend iwwer huet sech am Zentrum vu Portugal ee geféierleche Bëschbrand ausgebreet. Well déi betraffe Géigend schwéier accessibel war, war et de Pompjeeë net gelongen d'Feier komplett ënner Kontroll ze bréngen. De Brand an der Biergregioun vum Bezierk Castelo Branco zitt sech iwwer 25 Kilometer, konnt awer bis de Mueren bis zu 90 Prozent agekesselt ginn. Allerdéngs erwaarde sech d'Pompjeeën haut ee weidere schwéieren Dag.

Wéi et um Méindeg de Moien heescht, wier duerch dee staarke Wand an Temperature vun iwwer 35 Grad d'Feier ëmmer nees ausgebrach.

Engem leschte Bilan no goufen et bis ewell 30 Blesséierter, dorënner 12 Pompjeeën an 8 Zivilsten. De Weekend iwwer waren an där betraffener Regioun 760 Pompjeeë mat 230 Läschween an eelef Läschfliger souwéi Helikopter am Asaz. An der Nuecht op e Sonndeg ware präventiv schonn eng Partie Awunner evakuéiert ginn. Sollt d'Situatioun sech verschlëmmeren, misste weider Awunner hier Haiser verloossen. Landeswäit hunn e Sonndeg iwwer 1.700 Pompjeeën géint d'Flame gekämpft. A fënnef Regiounen am Zentrum an am Süde vu Portugal gëllt déi heegste Gefor vu Bëschbränn.

An der Biergregioun am Zentrum vum Land kënnt et reegelméisseg zu schlëmme Bëschbränn. Bi zwee uerge Feier am Summer an am Hierscht 2017 waren iwwer Honnert Mënschen ëm d'Liewe komm.