Den nationale Wiederdéngscht huet matgedeelt, dass op 7 Plazen an den USA historesch Héchstwäerter gemooss goufen.

Ënnert anerem zu Atlantic City an um New Yorker Fluchhafen JFK. Eng ganz Partie Miessstatiounen hunn Temperature vun tëscht 38 an iwwer 43 Grad registréiert. D'Hëtztwell huet sech vum Mëttlere Westen bis bei d'Atlantikküst gezunn.

Iwwer 157 Millioune Leit waren iwwert de Weekend vun deenen extremen Temperature betraff. Wéi amerikanesch Medie mellen, sinn op d'mannst 6 Persounen un de Suitte vun deenen héijen Temperature gestuerwen. Um Méindeg soll et an en USA ofkillen. Dofir gëtt elo an Europa mat enger neier Hëtztwell gerechent.

Meteorologen hu fir den Optakt vun där neier Woch fir grouss Deeler an Europa Temperature vun iwwer 40 Grad virausgesot. Schonn am Juni waren op ville Plazen Rekordtemperature gemooss ginn. Den Donneschdeg kéint den Héichpunkt vun der annoncéierter Hëtztwell markéieren, heescht et vum däitsche Wiederdéngscht. Ursaach dofir ass den Héich Yvonne.

Am Zentrum vu Portugal ass iwwerdeems de Weekend ee geféierleche Bëschbrand ausgebrach. Déi héich Temperaturen maachen d'Läschaarbechten immens komplizéiert.

De Juni war weltwäit de wäermste Juni zënter der Opzeechnung vum Wieder viru ronn 140 Joer. D'Mënschheet wäert also ëmmer méi mat Hëtztwellen an Zukunft ze kämpfen hunn. Och d'Arktis a Subarktis* wäerten ëmmer méi betraff sinn. Dem Klimafuerscher Mojib Latif no erwiermt sech d'Arktis duebel sou séier wéi de Recht vun der Welt.

*Subarktis = subpolar Zon vun der Nordhallefkugel. Subarktis ass eng Regioun an der nërdlech Hemisphäre, direkt südlech vun der Arktis an ëmfaasst Deeler vun Alaska, Kanada, Island, den Norde vu Skandinavien, Sibirien, d'Shetlandinseln an d'Cairnogorms.