Et kënnt e Mëttwoch zum Wiessel an der Downing-Street zu London. De Boris Johnson léisst déi britesch Premierministesch Theresa May op hirem Posten of.

Mat Spannung gouf um Dënschdeg op London gekuckt, wou de Successeur vun der Premierministesch Theresa May proklaméiert gouf.  Haushéije Favorit war den Ëmfroen no de fréieren Ausseminister Boris Johnson. Eng ganz Partie Member vun der Konservativer Partei trauen him zou, enttäuschte Brexit-Wieler nees u Bord ze kréien. Säi Konkurrent, den aktuelle briteschen Ausseminister Jeremy Hunt hat quasi keng Chance.

D'Walbedeelegung louch bei 87,4%. De Boris Johnson krut mat 92'153 Stëmmen der quasi duebel sou vill ewéi den Jeremy Hunt mat 46'656.

De Brexit-Hardliner Boris Johnson wëll Groussbritannien op den 31. Oktober aus der Europäescher Unioun erausféieren, noutfalls och ouni Accord.

Den neie Parteichef gëtt jo automatesch och neie britesche Premierminister. Bis e Méindeg den Owend konnten déi 160.000 Parteimember hir Stëmm via Bréifwahl ofginn. D'Resultat dovu gouf um Dënschdeg kuerz no 13 Auer bekannt gemaach.

No enger leschter Nuecht an der Downing Street, wäert sech d'Theresa May nach eemol de Froen am Parlament stellen , éiert si an de Buckingham Palace fiert, wou si der Kinnigin Elizabeth offiziell hir Demissioun bekannt ginn huet.

Am Virfeld vun der Ukënnegung, dass de Boris Johnson neie Premierminister gëtt, huet d'Erzéiungsministesch Anne Milton hire Récktrëtt ugekënnegt.