A China huet een Taifun, engem leschte Bilan no, op d'mannst 43 Doudesaffer gefuerdert.

Wéi chinesesch Staatsmedien um Méindeg de Moie melle, géifen nach ëmmer 17 Persoune vermësst ginn. Den Taifun hat e Samschdeg d'Ostküst vum Land erreecht an ass dunn Direktioun Norde gezunn. Eleng an der Provënz Zhejiang koumen zanter e Samschdeg 38 Mënschen ëm d'Liewen.

Mam Taifun "Lekima" sinn enorm Waassermasse vun uewen erof komm, esou datt op Plazen de Buedem opgeweecht gouf. Un der Küst goufe meterhéich Welle gemellt a Wandvitesse vun ëm déi 187 Kilometer an der Stonn. Iwwert 110.000 Mënschen hu missten an Noutlogementer den Dag verbréngen. Am ganzen hunn iwwert eng Millioun Mënschen hir Haiser misste verloossen.