No enger laanger Sichaktioun ass d'Läich vum Nora Quoirin fonnt ginn. D'Meedche war de 4. August aus engem Hotel a Malaysia verschwonnen.

D'Läich vum 15 Joer ale franséisch-iresche Meedchen gouf ronn 2,5 Kilometer vum Hotel ewech aus engem Floss gezunn. Een Helikopter huet si an d'Klinik bruecht, wou d'Elteren hiert Kand identifizéiert hunn.

Déi traureg Gewëssheet koum just een Dag, nodeems d'Elteren eng Belounung am Wäert vun 10.600 Euro fir Indicen iwwert d'Verschwanne vun hirer Duechter annoncéiert haten. D'Nora soll eng Léierschwieregkeet gehat hunn an et wier net einfach esou fortgaangen, ouni sengen Elteren eppes ze soen. Dowéinst si si ufangs dovunner ausgaangen, dass et gekidnapped gouf.

No der Autopsie huet d'Police confirméiert, dass eng Friemawierkung kann ausgeschloss ginn. D'Nora Quoirin wier un enger ënnerlecher Bluddung gestuerwen, ausgeléist duerch extreme Stress an Honger. Et hätt och keen Hiwäis op eng Vergewaltegung ginn. D'Meedche muss schonn 2 oder 3 Deeg no sengem Verschwannen aus dem Hotel dout gewiescht sinn.

Ëmgerechent ronn 118.000 Euro sinn duerch Spenden zesumme komm, fir der Famill ze hëllefen a si bei der Sich ze ënnerstëtzen. An net nëmmen dat: Iwwer 350 Leit hunn bei der 10 Deeg laanger Aktioun gehollef.