D'Biller vun den Tensiounen tëscht den Demonstranten an der Police um Fluchhafe vun Hongkong sinn ugangs der Woch ronderëm d'Welt gaangen.

De chineseschen Ambassadeur a Groussbritannien huet d'Manifestanten zu Hongkong gewarnt. Sollt d'Situatioun sech weider verschäerfen, wäert Peking net nokucken an agéieren. China hätt genuch Muecht a genuch Moyenen, fir d'Onroue séier ze ënnerdrécken.

Zanter Woche ginn d'Leit op d'Strooss, fir géint d'Regierung an der spezieller Verwaltungszon Hongkong ze protestéieren. Dobäi koum et an der Lescht zu Gewalt.

Et ware brutal Biller, déi eis aus Hongkong erreecht hunn: Biller vun Tensiounen tëscht den Demonstranten an der Police um Fluchhafe vun Hongkong. Net nëmmen huet dës Situatioun fir gréisser Stéierungen am Fluchverkéier gesuergt, ma och fir vill Konfrontatioun tëscht béide Campen.

De Bilan vun de Protestaktioune vum Tim Morizet

AUDIO: Ugespaante Situatioun zu Hongkong / Reportage Tim Morizet

E blesséierte Mann um Wee aus der Mass vu Leit eraus. D'Ambulanciere komme kaum un en. Vun allen Säite kritt en der gehaen. E puer Aktiviste bierele ronderëm de Mann: Hie wier en Undercover-Offizéier bei der Chinesescher Police - dës Beschreiwunge ginn d'Biller erëm, déi en Dënschdeg ronderëm d'Welt gaange sinn.

D'Policeween goufe vu den Demonstrante um Fluchhafe blockéiert, kuerz drop Mënschemasse mat Pefferspray zréckgedréckt. Et huet ausgesinn, ewéi wann d'Situatioun all Ament kéint eskaléieren. No e puer Stonnen awer, ouni weider gréisser Police-Asätz, huet sech d'Situatioun nees berouegt.

D'Resultat op der Plaz: Honnerte vu Flich goufen annuléiert, dat och nom 2. Dag vun den Anti-Regierungs-Protester um Fluchhafe vun Hongkong, bei deene bis elo 5 Persoune festgeholl goufen.

Kuerz no den Eskalatiounen huet déi chinesesch Regierung déi gewaltbereet Demonstrante um Fluchhafen dunn als Terroriste bezeechent. D'Dote vun den Demonstrante wieren net mat deene vun Terroristen ze ënnerscheeden, huet et um Dënschdegowend aus dem Alliance-Büro vun der chinesescher Regierung zu Hongkong geheescht. D'Protester wieren deemno aus der Siicht vu China terroristeschen Akten.

Déi Responsabel vum Fluchhafen hunn iwwerdeems geriichtlech festgehalen, datt d'Demonstranten net méi an d'Géigend vum Terminal dierfe kommen. Weider Protestaktiounen an Demonstratioune sinn an deem Sënn verbueden. D'Situatioun bléift also weider ugespaant.

Ewéi den US-President Donald Trump op Twitter schreift, wier en doriwwer informéiert ginn, datt déi chinesesch Regierung Militärtruppen op d'Grenz vun Hongkong positionéiert hätt. Zanter e puer Woche gëtt et schonn eng konzentréiert Usammlung vu gepanzerte Gefierer zu Shenzhen, engem direkten Noper vun Hongkong. Vun offizieller Säit heescht et awer bis ewell, datt dës just fir Tester an der Regioun geduecht wieren.

Virun ronn 10 Wochen haten déi regierungskritesch Protester, déi ëmmer nees a Gewalt ausschloen, ugefaangen. Bis ewell goufe 600 Persoune festgeholl.