Déi jonk Klimaaktivistin aus Schweden mécht sech vu Groussbritannien aus, u Bord vun enger Héichséi-Yacht, op de Wee Direktioun New York.

Vum südenglesche Plymouth erfort huet d'Klimaaktivistin Greta Thunberg sech e Mëttwoch op de Wee a Richtung New York gemaach. Hiert Ziel ass den UN-Klimasommet am Big Apple. Zwou Woche soll dës Rees daueren.

AUDIO: Greta Thunberg/Reportage Caroline Hermes

Op der 18 Meter laanger Hightech Yacht mam Numm "Malizia" soll et iwwer den Atlantik goen. D'Greta Thunberg start dës Rees zimlech genee ee Joer nodeems si decidéiert hat, fir eng besser Klimaschutzpolitik ze kämpfen a fir d'Anhale vun de Paräisser Klimaziler ze suergen.

Si ass ënnerwee mat den zwee Seegelexperten, Boris Herrmann a Pierre Casiraghi. Och der Greta hire Papp Svante an de Filmproduzent Nathan Grossman sinn u Bord. Dëse wëll d'Rees dokumentéieren.

D'Yacht soll exklusiv vu Wand, de Stréimungen, dem Solarzellestroum, deen u Bord produzéiert gëtt a vun Ënnerwaasser-Turbinnen ugedriwwe ginn. D'Greta Thunberg wëll natierlech esou klimafrëndlech ewéi méiglech reesen. Par konter sot déi 16 Joer al Aktivistin dem däitsche "Spiegel", dass wann eppes schif géing goen, ee Kompromësser misst agoen, da kéint och mol Diesel benotzt ginn, d'Sécherheet géif virgoen.

Nom UN-Klimasommet ass d'Greta dann och am Dezember an Chile un der annueller Weltklimakonferenz dobäi. Och Visitten a Kanada an a Mexiko sinn deemnächst virgesinn.

D'Greta Thunberg huet vill Jugendlecher europawäit matgerappt kritt, fir sech fir de Klimaschutz ze engagéieren. De Klimaschutz gouf ënnert anerem wéinst hir zu enger vun den absolute Prioritéiten op der europapolitescher Agenda.

D'Aktivistin gëtt awer och vu ville Säiten ëmmer nees kritiséiert, dës Kéier ass dat net anescht. Nodeems d'Medien erausbruecht haten, dass BMW, déi Schwäizer Privatbank EFG an de Yacht Club vu Monaco Sponsor vun der Malizia sinn, war d'Kritik grouss an als Reaktioun huet d'Greta all d'Indicë fir Sponsoring um Boot ewechgelooss.