Op der Vakanzeninsel, wou och all Joer vill Lëtzebuerger sinn, brennt et zanter e Samschdeg nees. Virun enger gudder Woch hat et scho gebrannt.

Wéi et um Dënschdeg heescht, wieren d'Bëschbränn op Gran Canaria zwar nach ëmmer ausser Kontroll, d'Feier géing awer méi schwaach ginn. De Wand huet nogelooss. E Mëttwoch koum du liicht Entwarnung.

De Bëschbrand, deen zanter e Samschdeg op en Neits an der Regioun an der Géigend vun der Uertschaft Valleseco ausgebrach ass, hat sech duerch déi vill Loft op  der Insel, de waarmen Temperaturen an der Dréchent immens séier ausgebreet. Ronn 10.000 Hektar Land sinn duerch d'Flamen zerstéiert, haaptsächlech Kiefer-Beem, am vun der Unesco zum Naturreservat erkläerte Nationalpark Tamadaba.

Iwwer 9.000 Mënschen hu mëttlerweil aus 40 verschidden Uertschafte missen a Sécherheet bruecht ginn. Et wéilt een näischt riskéieren. De President vun der Kanarescher Insel, Ángel Víctor Torres, seet, dat waarmt Wieder an déi niddereg Loftfiichtegkeet maachen et immens schwéier dat "extrem aggressiivt Feier" ze kontrolléieren.

© AFP

Antëscht sinn iwwer 600 Pompjeeën am Asaz, nieft 2 Läschfligeren an 9 Helikopteren.

D'Autoritéiten hu verlaude gelooss, dass ee vu Brandstëftung ausgeet.

De Lëtzebuerger Ausseministère suivéiert d'Situatioun op der Plaz, mä bis elo gouf nach kee Lëtzebuerger gemellt, dee Problemer op der Plaz gehat soll hunn. Mat Luxair sinn am Moment ronn 400 Lëtzebuerger op der Insel. D'Hoteller an deenen d'Gäscht hir Zäit verbréngen, si wäit fort vum Feier, net concernéiert.

Situatioun e Sonndeg

Ee Luxushotel an ee bei Touriste beléiften Aussiichtspunkt "Cruz de Tejada", am Zentrum vun der Insel, hunn e Samschdeg misse geraumt ginn. Donieft gouf d'Gemeng Tejada mat knapp 2.000 Awunner an d'Regioun ronderëm evakuéiert. D'Feier ass an där selwechter Regioun ausgebrach, wou viru 4 Deeg e Bëschbrand ënner Kontroll konnt bruecht ginn.

D'Inselverwaltung huet op Twitter gemellt, dass sämtlech Stroossen ronderëm d'Feier gespaart sinn an een d'Gebitt ronderëm soll verloossen.

© AFP

D'Pompjeeë si mat Helikopteren op der Plaz am Asaz. D'Situatioun wier wéinst de den héijen Temperaturen, de Loft an der Dréchent net immens gutt. E Läschfliger soll vum spuenesche Festland eriwwer op d'Insel fléien zur Ënnerstëtzung.
Virun enger Woch eréischt haten d'Pompjeeën e Bëschbrand an där selwechter Regioun am Zentrum vun der Kanaren-Insel ënner Kontroll kritt. Gläichzäiteg hat de Katastropheschutz gewarnt, duerch déi vill Loft kéinte Brandnäschter nees opflamen. Ronn 1.500 Hektar ware verbrannt.