D'Iran-Kris ass jo mat Top-Sujet um G7. D'Bränn am Amazonas goufen dann och kuerzfristeg vum franséische President op den Ordre du Jour vum Sommet gesat.

Eng diplomatesch Sensatioun gouf et e Sonndeg um G7-Sommet. Den Ausseminister vum Iran, de Mohammed Dschawad Sarif ass ganz iwwerraschend zu Biarritz um G7 gelant. Dat huet de Porte-parole vum Ausseminister zu Teheran am Iran confirméiert. D'Iran-Kris ass jo ee vun den Haaptsujeten beim Sommet vun de 7 gréissten Wirtschaftsnatiounen, e Sujet, bei deem d'USA an Europa komplett gespléckt sinn.

D'USA wëllen den Iran mat maximalem politeschen a wirtschaftlechem Drock dozou zwéngen, hir Aussepolitik komplett ze changéieren. Déi aner G7-Staaten sëtzen dogéint op d'Atomofkommes mam Iran, aus deem d'USA erausgeklomme sinn.

© Ludovic MARIN / POOL / AFP

Um G7 Sommet gouf sech drop gëeenegt, d'Bekämpfung vun de Bëschbränn am Amazonasgebitt z'ënnerstëtzen. D'Hëllef vun der G7 Grupp soll de betraffene Länner "sou séier wéi méiglech" zegutt kommen, dat huet de franséische President Emmanuel Macron am Kader vum Sommet zu Biarritz annoncéiert.

Et géif een mat de Länner aus der Regioun Kontakt ophuelen an et géing ëm technesch a finanziell Mëttele goen, sot de Macron nach ouni weider op Detailer anzegoen.

De Sujet gouf kuerzfristeg vum franséische President op den Ordre du Jour vum G7 Sommet gesat.

Konsens gouf et och bei der Fro op Russland erëm an de G7 Grupp opgeholl soll ginn. Russland war 2014 no der Annexioun vun der Krim aus der Grupp ausgeschloss ginn - aus der G8 gouf domat d'G7. D'Staats a Regierungscheffen hu sech zwar FIR en Dialog an eng Ofstëmmung mat Russland ausgeschwat, et wier awer nach ze fréi d'Land erëm an de Grupp ze loossen.

Et war dann um Sonndeg och déi éischt Entrevue tëscht dem neie britesche Premier an dem US President - de Boris Johnson an den Donald Trump hu sech um Bord vum G7 Sommet gesinn an e séieren Handelsaccord tëscht béide Staaten annoncéiert. En Vue vum Austrëtt aus der EU ass d'britesch Regierung un en Handelsaccord mat den USA ugewisen. De Boris Johnson huet allerdéngs betount, datt d'Negociatioune mat Washington schwiereg dierfte ginn.

Ofschlossdeklaratioun

Um leschten Dag vum G7-Sommet zu Biarritz bleift d’Fro, op an a wéi enger Form et zu enger Ofschlossdeklaratioun kënnt. Nodeems den US-President Trump d’Deklaratioun nom leschte G7 a Kanada nodréiglech fir ongëlteg erkläert huet, hunn déi siwen aflossräichsten Industriestaate fir d’éischte Kéier keng gemeinsam Ofschlosserklärung geplangt. Et kéinten awer gemeinsam Deklaratiounen op eenzele Punkte verëffentlecht ginn.

Nodeems den iraneschen Ausseminister d’Noriichten e Sonndeg dominéiert huet, well e sech onerwaart um Bord vum G7 zu Biarritz mat sengem franséischen Homolog getraff huet, geet et an de leschte Reuniounen um Méindeg ëm Ëmweltschutz an Aussepolitik. Parallel sinn och bilateral Entrevue geplangt. Zum Schluss vum G7-Sommet zu Biarritz wäert de franséische President Macron Bilan zéien, dëst wéi et ausgesäit zesumme mam amerikanesche President Donald Trump. Sou zumindest d'Informatioun aus dem Wäissen Haus, wou matgedeelt gëtt, dass den Donald Trump an den Emmanuel Macron um 15.30 Auer eng gemeinsam Pressekonferenz ginn.