D'Ongléck ass iwwert enger Residenz tëscht Inca a Costitx geschitt. Ënnert den Affer sinn 2 Kanner an hir Elteren.

Bei engem Zesummestouss an der Loft tëscht engem klenge Fliger an engem Helikopter sinn e Sonndeg de Mëtteg am ganze 7 Persounen ëm d'Liewe komm. U Bord vum Helikopter, dee vun der däitscher Firma "Rotorflug" war, souzen Elteren an hir 2 Kanner, sou wéi de Pilot. Bei der Famill handelt et sech ëm Leit aus Däitschland, de Pilot war leschten Informatiounen no Italiener.

Am Fliger souze wéi et schéint 2 Persounen. Hei ginn et onbestätegt Informatiounen, dass et sech ëm 2 Spuenier soll handelen.

Déi 7 Persounen sinn alleguerten beim Accident gestuerwen. Genee soll dat Ganzt um 13.36 Auer tëscht Inca a Costix, direkt iwwert enger Finca geschitt sinn.

Déi balearesch Ministerpresidentin Francina Armengol huet sech dann och op Twitter schockéiert iwwert d'Tragedie gewisen a schreift, dass si a Gedanke bei den Affer wier.