D'Parlament huet souwuel fir e Gesetz géint en ongereegelte Brexit, wéi och géint Neiwale gestëmmt.

Gesetz géint een No-Deal Brexit

Ëmmer nees huet de britesche Premier dem Parlament versprach, e neien, e besseren Deal mat der EU ëm de Brexit auszehandelen, ma zum Schluss konnt de Boris Johnson d'Deputéiert net iwwerzeegen.

AUDIO: Keen No-Deal Brexit, keng Neiwalen - Reportage Lynn Cruchten

327 Deputéierter hu fir e Gesetz gestëmmt, dat verhënnere soll, dass Groussbritannien ongereegelt Enn Oktober d'EU verléisst. Soll keen Accord bis den 31. Oktober fonnt ginn, géif de Brexit bis op den 31. Januar 2020 verréckelt ginn.

299 Deputéierter nëmme waren um Boris Johnson senger Säit a wollten e Brexit den 31. Oktober, deemno och am Fall vun engem No-Deal-Brexit.

D'Parlament hofft elo, d'Gesetz nach bis Enn der Woch definitiv duerchzekréien. Dës Motioun soll och dozou bäidroen, fir d'Kontroll iwwert den Agenda vum Parlament ze kréien, an deem sengem Besëtz normalerweis just déi britesch Regierung ass. Sou kéinten déi Deputéiert matdecidéieren.

Déi britesch Regierung huet am Kader vun de Brexit-Diskussiounen och annoncéiert, dass zousätzlech Ausgaben an Héicht vun 2.2 Milliarden Euro investéiert solle ginn, fir d'Suitte vum Brexit besser kënnen ofzefiederen. Déi Sue sollen d'nächst Joer zur Dispositioun stoen, wann de Brexit den 31. Oktober wier. Mat där Zomm sollen de Grenzschutz an d'Infrastrukturen op den Häfe garantéiert ginn.

Keng virgezunnen Neiwalen a Groussbritannien

No der éischter Néierlag fir de neie Premier, huet déi zweet net laang op sech sëtze gelooss: Nodeems d'Ofstëmmung iwwert e No-Deal Brexit géint de Boris Johnson gaangen ass, huet hie virgezunnen Neiwale fir de 15. Oktober ugefrot, fir d’Vollek entscheeden ze loossen, wien de 17. Oktober als britesche Premier um Brexit Sommet zu Bréissel sollt Deel huelen: de Boris Johnson oder den oppositionelle Labour-Chef Jeremy Corbyn.

Wéineg iwwerraschend ass dës 2/3-Majoritéit net zesummekomm, dofir hätt hien och d'Stëmme vun der oppositioneller Labour-Partei gebraucht.

D'Parlament huet géint Neiwale gestëmmt, well een ënnert anerem gefaart huet, dass bei engem positive Vott, de Premier d'Walen dann op en Datum nom 31. Oktober hätt kéinte verréckelen. Sou wier et dann trotzdeem zu engem No-Deal Brexit komm.

Nächste Méindeg soll d’House of Commons den Entworf dann zréck hunn fir nach eventuell Textännerungen ze maachen ier d’Gesetz a Kraaft trëtt. D’Regierung hat e Donneschdeg de Moien hire Widderstand géint de Gesetzesprojet opginn a verséchert, et géif am House of Lords net blockéiert ginn

D'Zwangspaus vum britesche Parlament, déi de Boris Johnson duerchgedréckt huet, ass legal. Dat huet um Mëttwoch déi héchste schottesch Instanz decidéiert. 75 pro-europäesch Deputéiert haten eng juristesch Prozedur lancéiert, fir ze verhënneren, datt d'Parlament net méi kéint zesummekommen, bis de Brexit virun der Dier stéing. Ähnlech Plainte lafen awer aktuell nach virun der Geriichter zu London an am nordiresche Belfast. Leschte Mëttwoch hat den Johnson annoncéiert, datt dat britescht Parlament vu Mëtt September bis Mëtt Oktober suspendéiert gëtt.

Brexit - Boris Johnson
En Dënschdeg den Owend hunn déi Deputéiert am House of Commons majoritär fir eng Motioun gestëmmt, déi de Wee fir e Gesetz géint en No-Deal-Brexit fräi maachen.

Reaktioun vum Lëtzebuerger Europadeputéierte Charel Goerens

Hien hätt mat Interessi constatéiert, datt d'britescht Parlament sech strukturéiert an datt et am House of Commons e Bewosstsinn gëtt, datt Groussbritannien net ouni Deal kann eraus goen.Esou kommentéiert de Lëtzebuerger Europadeputéierte Charel Goerens d'Evenementer vu Westminster.

Et wier par konter à ce stade schwiereg fir ze bewäerten, wéi et ausgeet: "Et muss ee kucken, wéi d'Parlament seng Autoritéit ka retabléieren. Et huet sech an engem endlosen Zickzack-Kurs virun der ganzer Welt blaméiert.
Lo ass et un den anere Parteien a Formatioune fir eng gemeinsam Front ze maachen. Politesch ass dee Kampf nach net ausgestanen. Ech kann Iech kee Pronostik maachen haut wéi dat geet.  De Boris Johnson wëll jo ëmmer de Ball der EU zeréck schéissen. Ma déi ass irreprochabel an deem wat se ausgehandelt huet."

AUDIO: Eng schwiereg Bewäertung - Charel Goerens


Mat Neiwale kéint de Boris Johnson sech am Charel Goerens sengen Ae verkalkuléieren: "A Groussbritannien ass eppes sécher. De Premierminister gëtt net onbedéngt belount wann e seng Majoritéit wëll renforcéieren.
Ech erënneren drun, datt scho vill méi dichteger wéi hie Wale verluer hunn."

AUDIO: Neiwalen? - Charel Goerens

De Charel Goerens ass elo Vizepresident vun der parlamentarescher Kommissioun fir konstitutionell Affären an där de Brexit reegelméisseg e Sujet ass.