Den US-President Trump huet säin Accord ginn, dass op Pëtrol aus amerikanesche Reserven duerf zeréckgegraff ginn.

No den Dronenattacken op déi gréisste Pëtrolsraffinerien a Saudi-Arabien de Weekend iwwer sinn um Méindeg de Muere bei der Ouverture vun den Handelsmarchéeën d’Präisser vun den zwou wichtegste Pëtrolszorte staark ugezunn. Ëm 20 Prozent sinn d’Präisser an d’Luucht gaangen, duerno hu se sech nees berouegt, an hu sech bei engem Plus vu ronn 10 Prozent agependelt. D’Fro, déi sech d’Autosfuerer natierlech stellen: huet dat een Impakt op d’Pompelen?

AUDIO: Pëtrolspräisser: De Reportage vum Nadine Gautier

D’Präisser fir de Barrel vun der Nordséi-Zort Brent, déi fir eis d’Referenz ass, läit bei ronn 65 Dollar. Och déi zweeten Zort West Texas Intermediate ass geklommen, op elo ëm déi 60 Dollar. Dat sinn déi héchste Präisser zanter Mëtt Juli. D’Mäert hunn also op d’Dronenattacke reagéiert, ma si kéinte sech nees berouegen. Fir datt d’Pëtrolspräisser permanent an d’Luucht ginn, misst et zu engem massiven arméierte Konflikt kommen, deen d’Produktioun an d’Versuergung mat Pëtrol op eng laang Dauer géif stéieren, seet de President vum Ifo Institut fir Wirtschaftsfuerschung zu München, de Clemens Fuest. Och aner Analyste ginn dovunner aus, datt d’Kapassitéiten nees dierften hiergestallt ginn, allerdéngs kéint dat Wochen daueren. Duerch d’Attack wier eng Dagesproduktioun vun 5,7 Milliounen Barrel concernéiert, dat si ronn 5 Prozent vun der weltwäiter Offer.

Zu Lëtzebuerg dierften d’Attacken a Saudi-Arabien kaum een Afloss op de Pëtrolspräis hunn, och wann een dat elo net direkt viraussoe kéint. Mä vill schwätzt dogéint. Lëtzebuerg kritt säi Pëtrol iwwert d’Däitschland, Frankräich an der Belsch. An Däitschland sengersäits krut zum Beispill d’lescht Joer just 1 Prozent Pëtrol aus Saudi-Arabien, esou datt den Impakt scho ganz geréng dierft sinn. Donieft sinn et déi international Marchéspräisser déi impaktéiert sinn. Bei eis ass ee System en place deen den Decalage opfänkt.

Och wann de Brent elo bei ëm déi 65 Dollar de Barrel leit, virun engem Joer loung en ëm dës Zäit bei iwwert 80 Dollar.

Den amerikanesche President Donald Trump huet e Sonndeg den Owend iwwert Twitter iwwerdeems annoncéiert, sollt et zu Enkpäss kommen, géifen déi national Reserven unzaapt ginn. Esou soll den Impakt op de Präis an den USA minimiséiert ginn.

Steet nach ëmmer d’Fro vun de Schëllegen am Raum. Zwar hunn d’Huthi Rebellen aus dem Jemen sech schonn zu den Attacke bekannt, ma d’Amerikaner maachen den Iran dofir responsabel. E Samschden hat den amerikaneschen Ausseminister Mike Pompeo dës Aussoe gemaach. Den amerikanesche President Donald Trump huet iwwert Twitter just Undeitunge gemaach: Et géif ee d’Täter kennen an huet dës virun enger Revanche gewarnt. Et géif een awer d’Äntwert vu Saudi-Arabien ofwaarden. Teheran huet iwwerdeems all Rumeur dementéiert.