Zu Tréier am Quartier Euren, eng 10km vu Waasserbëlleg ewech, gouf en Dënschdeg de Mëtteg wärend Bauaarbechten eng britesch Fligerbomm aus dem Krich fonnt.

D'Bomm ass 250 Kilo schwéier a mat engem Zünder equipéiert, wéi d'Stad Tréier en Dënschdeg matgedeelt huet. Et handelt sech ëm eng Bomm vum Typ MC 500.

Um Mëttwoch gouf decidéiert, datt dës Bomm e Sonndeg géing entschäerft ginn. 2.300 Awunner misste fir 3 Stonnen hir Haiser am Ëmkrees vu 500 Meter verloossen.

No Donnéeë vun den Demineuren ass keng Gefor vun der Bomm ausgaangen, déi an ongeféier 1 Meter 20 Déift louch. Si gouf wärend Sondéierungen am Kader vu Bauaarbechten an der Géigend vun enger Sportshal am Staddeel Euren fonnt. Déi betraffe Géigend gouf doropshin ofgespaart.