E Méindeg de Moien hunn déi amerikanesch Truppen am Norde vu Syrien ugefaangen, sech aus de Regiounen ëm déi tierkesch Grenz zeréckzezéien.

Domadder iwwerloossen d'Amerikaner strategesch Positioune wéi Ras Al Ain an Tal Abyad. E Méindeg de Moie fréi hat de Pentagon annoncéiert, datt d'Amerikaner sech géifen zeréckzéien, well eng Offensive vun der tierkescher Arméi un der Grenz géif an d'Weeër geleet ginn. Zil wär et, kurdesch Rebellen aus der Grenzregioun ze verdreiwen. D'US-Arméi, déi d'Kurden ënnerstëtzt, wëll sech aus deem Konflikt eraushalen. Dofir wieren an Zukunft keng US-Zaldoten do méi präsent. An engems ass et awer och eng Warnung vum Trump un d'Adress vun Ankara. Sollt d'Tierkei a Syrien ze wäit goen, géifen d'USA déi tierkesch Wirtschaft komplett zerstéieren.

Dat soll den amerikanesche President Donald Trump dem tierkesche Staatschef Erdogan um Telefon erkläert hunn. D'Amerikaner géifen déi geplangten Offensive vun Ankara an der Regioun, déi vun enger Kurdemiliz kontrolléiert gëtt, och net ënnerstëtzen. Vum tierkesche President Erdogan huet et iwwerdeems geheescht, datt d'Operatioun a Syrien zu all Moment kéint starten.

D'syresch Kurde fäerten elo, datt den Islamesche Staat duerch dës Decisioun an der Regioun nees kéint zeréckkommen. Och wann d'Militäroffensive kurdesch Prisongen esou wéi Lokalitéite géif viséieren, wou fréier IS-Kämpfer an deenen hir Familljen ënnerbruecht gi sinn.

D'EU warnt déi tierkesch Regierung virun enger Offensive an der syresch-tierkescher Grenzregioun. Duerch esou eng Militäroperatioun kéinten am Norde vu Syrien Zivilisten zu Schued kommen an et kéint zu enger Masseflucht kommen. Och déi kurdesch Unitéiten hu virun enger Offensive gewarnt. Doduercher kéint den Islamesche Staat nees méi staark ginn.