Op d'mannst 2 Persoune si bei enger Attack op eng Synagog ëmkomm. Och zu Landsberg goufe Schëss gemellt, ee Verdächtege gouf verhaft.

Wéi d'Police vun Halle matdeelt, gouf et op d'mannst zwee Doudeger an zwee Schwéierblesséierter bei enger Schéisserei an der Stad am Oste vun Däitschland. Et goufe Schëss an et soll och eng Handgranat op de jiddesche Kierfecht geheit gi sinn. Weider sollen och Schëss zu Landsberg, ronn 15 Kilometer vun Halle ewech, gefall sinn.

Éischten Informatiounen no soll de Virfall virun enger Synagog an der Humboldtstraße geschitt sinn. E Mann hätt hei probéiert, mat Gewalt an d'Gebai eranzekommen an dunn ugefaangen hu mat schéissen. D'Police huet de Beräich ofgespaart.

Dës Attack, virun enger jiddescher Synagog an engem jiddesche Kierfecht, ass da genau op Jom Kippur passéiert, dem héchste vun de jiddesche Feierdeeg.

Den Täter war no der Dot geflücht. D'Police hat d'Awunner vun Halle opgeruff, an hiren Haiser ze bleiwen oder op eng sécher Plaz ze goen. Géint 14 Auer huet d'Police du gemellt, datt een eng Persoun festgeholl hätt. Ma am ähnlechen Zäitraum goufen och Schëss zu Landsberg e puer Kilometer vun Halle ewech gemellt.

D'Police hat de Leit dowéinst weider geroden, doheem ze bleiwen. D'Stad hat d'"Amoklage" ausgeschwat an e Krisestaf ageruff. D'Rettungsekippe waren alarméiert, esou datt si am Fall wou nach eppes géif passéieren, reagéiere kënnen.

Wéi de Spiegel matdeelt, huet d'Bundesanwaltschaft d'Ermëttlungen opgeholl.

Um kuerz virun 18 Auer e Mëttwoch den Owend koum d'Matdeelung vun der Police, dass en Täter och e selwer gebaute Sprengsaz bei d'Synagog geluecht huet.

No 19 Auer de Mëttwoch den Owend koumen du weider Informatiounen, esou huet et geheescht, dass et sech nëmmen ëm een Täter handele géing. Dësen hätt d'Dot mat enger Helmkamera gefilmt an op den Internet gesat. Am Video géif een dacks héieren, wéi hie Judde vernennt, esou dass d'Police vun antisemiteschen a rietsextreme Motiver ausgeet. Den Täter soll ee 27 Joer alen däitsche Staatsbierger aus Sachsen-Anhalt sinn.

Den Inneminister Horst Seehofer informéiert en Donneschdeg de Moie wou d'Enquête drun ass.

Am Internet soll ee méiglecht Manifest vum Täter vun Halle opgedaucht sinn

Wéi et vun enger spezialiséierter Firma aus den USA heescht, géifen an dësem PDF-Dokument Fotoe vu Waffen a Munitioun gewise ginn, déi bei der Attack an den Asaz koumen. Donieft géif et och een Hiweis ginn op de Livestream vun der Dot. Als Zil vun der Attack géif an dësem Dokument festgehale ginn, sou vill wéi méiglech "Anti-Wäisser" ëmzebréngen, an der Haaptsaach Judden. D'Dokument soll den 1. Oktober verfaasst gi sinn. Déi amerikanesch Entreprise ass op d'Iwwerwaachung vun extremisteschen Internetsäiten spezialiséiert. D'Zeitung "Die Welt" hat geschriwwen, dass am Internet een zéng Säiten déckt Dokument opgedaucht wier, dat op den Täter géif hiweisen.

4 Kilo Sprengstoff goufen am Gefier vum Täter fonnt

D'Dot vun Halle gëtt als Terrorismus agestuuft. „Wat mir erlieft hunn, war Terror", sot de Generalbundesanwalt Peter Frank en Donneschdeg de Mëtteg op enger Pressekonferenz zu Karlsruhe. De presuméierte Mäerder hätt wëllen ee Massaker an der Synagoge maachen. De Verdächtege wier e Mënsch, deen déif markéiert wier vu Friemenhaass an Antisemitismus.

Wéi den däitsche Parquet general fédéral erkläert huet, wieren am Auto vum Täter och 4 Kilo Sprengstoff fonnt ginn. Dem Mann gëtt zwee Mol Mord virgehäit an 9 Mol versichte Mord.

Schaarf Kritik un der Police

Den Zentralrot vun de Judden an Däitschland huet an tëscht d'Police schaarf kritiséiert. Et wier ee Skandal, dass d'Synagoge zu Halle op engem Feierdag wéi dem Jom Kippur net protegéiert gi wier. Et ass de Reproche un d'Adresse vun der Police net séier genuch reagéiert ze hunn. Et hätt op d'mannst zéng Minutte gedauert, bis d'Beamten no sengem Appell op der Plaz ukomm wieren, sot de President vum Zentralrot Josef Schuster e Mëttwoch den Owend.

Den israelesche Premier Netanjahu huet des Terrorattack als en neien Ausdrock op deen ëmmer méi groussen Antisemitismus an Europa bezeechent. De Bundespresident Frank-Walter Steinmeier huet een Appell fir Solidaritéit mat de jüddesche Matbierger gemaach. Sou eng Attack op eng voll besat jüddesch Synagoge hätt een sech an Däitschland net méi kënne virstellen, sou den däitsche President.

EU-Kommissioun fuerdert besser Protektioun

No der rietsextremer Terrorattack vun Halle huet d'Europäesch Kommissioun eng besser Protektioun fir jüddesch Institutiounen an den EU-Staate gefuerdert. Wéi et heescht, géifen et eng Rei Länner ginn, déi op deem Niveau nach vill ze dinn hätten. Deelweis misste jüddesch Communautéite 50% vun hirem Budget fir Sécherheetsmesuren ausginn. Dëst wier awer eng Aufgab an d'Responsabilitéit vun all Staat. Dat geet aus engem Schreiwes vun der Kommissioun ervir, dat un all d'Regierung an der Europäescher Unioun gaangen ass.