Fir déi aktuell ugespaante Situatioun am Chile ze berouegen, huet de President vum Land, Sebastián Piñera, ee ganz Pak u Sozialmesuren annoncéiert.

Sou soll d'Mindestrent ëm 20% erhéicht an d'Stroumpräisser agefruer ginn. Dës Mesuren huet de chilenesche President en Dënschdeg den Owend wärend enger Usprooch am Presidentepalais zu Santiago bekannt ginn. Donieft soll och eng Krankeversécherung fir besonnesch schwéier Pathologien agefouert ginn. De Piñera sot, dass een de Message vum chilenesche Vollek verstanen hätt. Donieft huet hien sech dofir entschëllegt, dass hien d'Ausmooss vun der sozialer Onzefriddenheet net erkannt hätt. De chilenesche President huet sech konziliant gewisen an sech bei de Bierger entschëllegt.

Duerch déi sozial Onrouen an de leschten Deeg koumen an dem südamerikanesche Land 15 Mënschen ëm d'Liewen. Déi brutal Protestaktiounen haten de leschte Freideg ugefaangen.

Duerch e Feier an enger Kleederfabrick si 7 Persounen ëm d'Liewe komm. Zwou Fraen an ee Mann sinn iwwerdeems duerch Bränn an zwee Supermarchéë gestuerwen. Aner Doudesaffer goufen an enger ausgebrannter Hal fonnt.

Wéi de Staatssekretär vum Inneministère Rodrigo Ubilla en Dënschdeg matgedeelt huet, wieren an den Uertschafte Coquimbo a La Serena zwou Persounen duerch Schëss ëm d'Liewe komm. Wien d'Schëss lassgelooss hätt, wier zu dësem Ament nach onkloer. Donieft koum ee weidere Mënsch an der Stad Talcahuano ëm, wéi e Militärgefier d'Persoun ze pake krut.

D'Police ass mat Tréinegas a Waasserwerfer géint déi deels vermummten Demonstrante virgaangen. 80 Metrostatioune goufe bis ewell attackéiert a sëlleche Busser a Brand gesat. Den Autoritéiten no koum et zu bal 1.500 Arrestatiounen. Den Ausnamezoustand an eng Ausgangsspär fir Santiago gëlle weider. Iwwer 10.000 Zaldoten a Poliziste sinn am Asaz.

Déi brutal Protester waren no enger Hausse vun de Tickete fir d'Metro zu Santiago ausgebrach an hu sech ganz séier iwwert dat ganzt Land ausgebreet. Dobäi koum eng landeswäit Hausse vun de Stroumpräisser vun 10%.

Vun dësem Mëttwoch un ass Lëtzebuerg op der Jugend-WM am Karate zu Santiago am Chile am Asaz

Aktuell ass d'Situatioun am Chile ugespaant. Duerch d'Protester an de leschten Deeg goufen et schonn eng ganz Partie Doudesaffer.