Déi Liberal vum Premierminister Justin Trudeau goufe bei de Parlamentswalen a Kanada op en Neits stäerkste Kraaft.

Analys Parlamentswalen a Kanada / Reportage Nadine Kremer

A Kanada bleiwen déi Liberal vum Premier Justin Trudeau, de Prognosen no, stäerkste Kraaft am Parlament, mä si verléieren awer hir absolut Majoritéit. Den Trudeau huet sech domat géint säi konservativen Erausfuerderer Andrew Scheer duerchgesat. Hie kéint elo eng Minoritéitsregierung forméieren. Dës wier allerdéngs op de Support vun anere Parteien ugewisen, zum Beispill d'Sozialdemokraten oder déi Gréng.

De President vun de Sozialdemokrate soll eegenen Aussoen no dann och scho mam Justin Trudeau iwwert eng méiglech Kooperatioun geschwat hunn. Bis ewell haten déi Liberal eng komfortabel Majoritéit vun 184 Sëtz. 170 Mandater sinn néideg fir eleng kënnen ze regéieren.

Ronn 27 Millioune Leit ware stëmmberechtegt. Op Twitter huet den US President Trump antëscht dem kanadesche Premier fir seng Walvictoire gratuléiert.

Gespréich mat der RTL-Korrespondentin Nadine Kremer