Den israelesche Premier vu bis elo, Benjamin Netanjahu huet dem President Reuven Rivlin säi Mandat, fir eng nei Regierung ze forméieren, zréckginn.

Echec fir de laangjäregen israelesche Premier Benjamin Netanjahu. Et ass him net gelongen eng nei Regierung ze forméieren. Elo läit de Ball bei sengem Rival Benny Gantz, deen d'Walen u sech gewonnen hat.

De Benjamin Netanjahu huet an enger Reaktioun op Facebook betount, dass et him net gelonge wier de Benny Gantz un de Verhandlungsdësch ze bréngen. Wéi israelesch Medie mellen, hätt de President Reuven Rivlin e Méindeg den Owend annoncéiert, dass hien elo de fréiere Militärchef mat der Regierungsformatioun géif chargéieren. Dat soll schonn um Dënschdeg de Fall sinn.

Dem Benjamin Netanjahu säin Erausfuerderer huet dee Moment véier Wochen Zäit eng Regierung op d'Been ze stellen. Sollt hien et net fäerdeg bréngen, eng Koalitioun ze forméieren, huet jiddwer Deputéierten d'Méiglechkeet, 61 Volleksvertrieder aus der Knesset fir eng Koalitioun ze sichen. Sollt dat bannent 21 Deeg net geléngen, riskéiert Israel fir drëtte Kéier bannent engem Joer Parlamentswalen.