De franséische President Emmanuel Macron fënnt nawell däitlech Wieder, fir déi strategesch Decisioune vun der Nato ze beschreiwen.

"Mir erliewe grad de Gehirdoud vun der Nato", sot hien am "Economist". Et géif bei strategeschen Decisioune keng Koordinatioun ginn tëscht den USA an den anere Partner. Et géif een déi éischte Kéier mat engem amerikanesche President konfrontéiert sinn, deen d'Iddi vun engem europäesche Projet net géif deelen.

Derbäi kéim, datt d'Nato-Land Tierkei onkoordinéiert an aggressiv géing handelen. Domat ass d'Militäroffensiv géint d'Kurden am Norde vu Syrien gemengt.

D'Nato feiert dëst Joer hire 70. Anniversaire. An e puer Wochen ass den Nato-Sommet wou d'Allianz hire Ronne Gebuertsdag feiert.