De Lëtzebuerger Ausseminister huet déi aktuell Lag ëm den Handelskrich en Donneschdeg zu Bréissel als "net einfach" betitelt.

Jean Asselborn iwwer Handelskonflikt / Rep. Pierre Jans

"D'Situatioun ass net ganz einfach!'', dat sot de Lëtzebuerger Ausseminister Jean Asselborn, nodeems en Donneschdeg de Moien am Conseil vun den EU-Ausseminister iwwer den Handelskonflikt mat den USA diskutéiert gouf. D'Negociatioune wären aktuell festgefruer. De Jean Asselborn beschreift d'Problemer folgendermoossen:

''Mir kommen net viru mat den Amerikaner, wat d'Produkter aus der Industrie ugeet, fir do d'Tariffer op der Douane ofzeschafen. D'Amerikaner wëllen, datt mir als Géigeleeschtung hir landwirtschaftlech Produiten an d'EU eranhuelen. Dat wëlle mir awer net. Mir wëlle keen TTIP 2 opbauen. Bei den europäeschen Autoen ass den Ament ''Funkstille''. Den Delai, deen den Här Trump selwer gesat hat, ass expiréiert. Mä do däerfe mir eis näischt virmaachen, dat schlummert elo, kann awer all Ament nees ausbriechen.''

Als drëtt Problematik huet de Lëtzebuerger Chefdiplomat de Konflikt am Aviatiounssecteur. Et gouf US-Sanktiounen a Milliardenhéicht géint déi europäesch Firma Airbus, nodeems d'Welthandelsorganisatioun den USA an engem Urteel Recht ginn hat. D'selwecht sollt d'EU d'Konkurrenz aus den USA, d'Entreprise Boeing wéinst onerlaabte Subventioune bestrofe kënnen. Doriwwer soll an der nächster Zäit diskutéiert ginn, huet de Jean Asselborn gekläert. Mä bis ewell wär et nach net méiglech gewiescht, en Accord mat den USA ze fannen.