E Freideg de Mëtteg koum et op der London Bridge zu engem brutalen Tëschefall. Ee mat engem Messer arméierte Mann huet do op d'Leit agestach.

Wéi d'Police op Twitter matgedeelt huet, goufe si um 13.58 Auer wéinst enger Messerstiecherei an der Géigend vun der London Bridge alarméiert. Ee Mann hat do op d'Leit agestach an der e puer blesséiert. Engem Passant war et gelongen, fir dem Täter d'Messer ewechhuelen, een aneren hat den Onbekannten iwwerwältegt. D'Police huet duerno op den Täter geschoss.

E Freideg den Owend hat e Spriecher vu Scotland Yard confirméiert, datt den Täter vun der Police erschoss gouf. Weider war et d'Informatioun, datt de Mann eng Attrapp vun engem Sprengstoffrimm bei sech hat.

Bei der Messerattack sinn och zwee Passanten, déi verwonnt gi waren, méi spéit un hire Blessure gestuerwen, sou d'Policevertriederin Cressida Dick e Freideg den Owend. Si huet domadder Berichter vun der BBC an der Noriichtenagence PA bestätegt. Dräi weider Persoune ginn aktuell a Klinicke behandelt.

© AFP

Scotland Yard schafft intensiv mat der Police vu London zesummen, fir d'Hannergrënn vun der Dot opzeklären. Et behandelt een den Tëschefall aktuell als Terrorattack. Ob et och eng war, ass bis elo nach net gewosst. Et soll iwwerdeems keng Bedreeung fir d'Bevëlkerung méi bestoen, sou nach d'Autoritéiten.

De Buergermeeschter vu London Sadiq Khan hat e Freideg am fréien Owend de Leit an och der Police Merci gesot fir hiert Agräifen an hiren Asaz. Iwwerdeems war et den Opruff, datt d'Leit Videoe vun der Dot un d'Police solle weiderleeden.

De franséische President Emmanuel Macron schreift e Smaschdeg op Twitter, seng Gedanke wier beim brittesche Vollek, den Affer vun der Terrorattack an deenen hirer Famill. D'Attack hätt London am Häerz getraff.

Täter war der Police bekannt

Den Attentäter vu London war bei den Autoritéiten scho bekannt. Den 28 Joer alen Mann war iwwerdeems schonn eng Kéier am Joer 2012 wéinst engem terroristeschen Delit verurteelt ginn. Eréischt zejoert war hien aus dem Prisong erauskomm, an dat virzäiteg an op Sursis. Dat huet de Chef vun der brittescher Anti-Terror-Police Neil Basu matgedeelt a präziséiert, dass den Täter an der Géigend un Staffordshire gelieft huet.

E weideren Täter géif den Ament iwwerdeems net gesicht ginn, esou den Neil Basu. D'Autoritéite géifen awer séier schaffen fir ebe sécher ze stellen, dass keng weider Persounen an déi Dot verwéckelt waren an dass keng Gefor fir d'Ëffentlechkeet méi bestoen géing. Do virdrun hat awer zum Beispill déi brittesch Noriichtenagence PA iwwer Kontakter zu ''islamisteschen terroristeschen Vereenegungen geschwat''.

De Premier Boris Johnson huet gesot, et wär e Feeler, gewaltbereet Krimineller fréi aus dem Prisong ze loossen.

Ellen Erënnerungen

Am Juni 2017 waren 3 Attentäter vum islamesche Staat op där selwechter Bréck mat enger Camionnette a Leit gerannt an hunn dono op Persounen agestach. Et hat 8 Doudeger an ëm déi 50 Blesséierter ginn.

Weider Messerattack e Freideg zu Den Haag

Zu Den Haag huet e Freideg den Owend e Mann Passante mat engem Messer attackéiert.