Zu Den Haag an Holland gouf et e Freideg 3 Blesséierter bei enger Messerattack. Indicen op eng terroristesch motivéiert Dot gëtt et hei net.

Dräi Mënsche waren verwonnt ginn, wéi e Mann an der grousser Akafsstrooss ''Grote Marktstraat'' am Zentrum vun der Stad mat engem Messer op Passanten agestach hat. Déi dräi Blesséiert si mannerjäreg ewéi d'Police matdeelt, si si mëttlerweil nees aus dem Spidol eraus. Den Täter ass op der Flucht a gëtt vun der Police gesicht.

Indicen op eng terroristesch motivéiert Dot gëtt et hei net. D'Police huet awer erkläert, ''an all Richtungen'' ze enquêtéieren.

Messerattack zu London

E Freideg am Nomëtteg war et zu London zu enger Messerattack op der London Bridge komm. Den Täter gouf vun der Police erschoss. 2 weider Persoune si bei der Attack ëm d'Liewe komm.