De Prënz Andrew steet wéinst senger Verbindung zum Jeffrey Epstein staark ënner Drock. Elo huet dat presuméiert Mëssbrauch-Affer sech zu Wuert gemellt.

Huet de brittesche Prënz e Mannerjäregt mëssbraucht? Dës Uschëllegung ginn et den Ament géint de Prënz Andrew, deen an den Epstein-Skandal soll verwéckelt sinn. D'Kinnekshaus hält sech bedeckt, e Méindeg huet dat presuméiert Affer an engem Interview op BBC ausgesot.

D'US-Amerikanerin Virginia Giuffre huet schwéier Virwërf géint den 59 Joer ale Jong vu der Queen gemaach. Si wier mat 17 Joer an de Joren 2001 an 2002 dräi Mol zum Sex forcéiert ginn. De Prënz Andrew bestreit dëst.

Am BBC-Interview huet déi haut 35 Joer al Fra weider Detailer bekannt ginn, déi de Prënz schwéier belaaschten. Si huet do iwwer en Openthalt an der Epstain-Villa op de Virgin Islands geschwat. Si wier do deemools mat e puer anere jonke Meedercher an e Gaardenhaus geschéckt ginn, wou si sech hätte missen ausdoen an opgefuerdert goufe sech ze këssen an ze heemelen.

"Mir si wéi Spillsaache ronderëm gereecht ginn".

Eng zweet Renconter hätt et zu London am Haus vum Ghislaine Maxwell, enger Frëndin vum Epstein, ginn. Och do wier et e puer Mol zum Sex komm, ongewollt. Si hätt just dat gemaach, wat si och hätt misse fir den Jeffrey Epstein maachen.

"Hie weess wat geschitt ass, ech weess wat geschitt ass. A just ee vun eis zielt d'Wouerecht".

Um Enn vum BBC-Interview huet d'Virginia Roberts Guiffre nach e Message un de Public:

"Ech bieden d'Mënschen a Groussbritannien, sech op meng Säit ze stellen. Dëst ass keng knaschteg Sexgeschicht. Dëst ass eng Geschicht iwwer Mënschenhandel. Eng Geschicht iwwer Mëssbrauch an eng Geschicht iwwer d'Kinneklechkeet vun ärem Typ".

De Prënz Andrew hat am November an engem BBC-Interview ausgesot, sech net un d'Guiffre z'erënneren, déi deemools Roberts geheescht huet. Och eng Foto, déi hie mam Meedchen am Haus vun der Epstein-Frëndin Ghislaine Maxwell zu London weist, wëll hien net erëmerkennen. Et kéint een net soen, dass dës Foto echt wier.

Et ginn nach 5 aner Fraen, déi de Prënz beschëllegen, si hätte bei Massage a Sexorgien nogekuckt.

De brittesche Prënz steet wéinst dem Kontakt zum verstuerwene Geschäftsmann Jeffrey Epstein ënner Drock. Den US-Multimillionär hat sech Uganks August an engem Prisong zu New York d'Liewe geholl. Him war virgeworf ginn Dosende Mannerjäreger mëssbraucht an zur Prostitutioun forcéiert ze hunn.

De Prënz Andrew ware laang mam Epstein befrënnt, huet dacks bei him iwwernuecht. Vun de Faiten, déi sengem Kolleeg virgehäit goufen, wëll hien näischt matkritt hunn. An awer huet hie Konsequenzen doraus gezunn an all seng Obligatioune fir d'Kinneksfamill ofginn. Hien huet versprach sämtlechen zoustännegen Autoritéiten am Kader vun den Ermëttlungen ze hëllefen.