D'Tories kommen op iwwer 360 Sëtz an hunn domat déi absolut Majoritéit am Ënnerhaus. De Boris Johnson soll elo eng Regierung forméieren.

Dat wier e "Muechtvollt Mandat fir de Brexit", sot et ewell de Boris Johnson. Hie selwer huet säi Walkreess zu London iwwerdeems och ganz kloer fir sech entscheet, mat iwwer 7000 Stëmmen Avance. Den Johnson huet no der Victoire annonçéiert, de Brexit pénktlech den 31. Januar 2020 ëmzesetzen.

No senger Victoire bei de Parlamentswalen, krut de Premier Boris Johnson um Freideg de Moien de Feu-vert vun der Queen, fir kënnen eng Regierung ze forméieren. D'Gespréich soll iwwert eng hallef Stonn laang gedauert hunn.

De Boris Johnson iwwert d'Walresultat

De Labour-Chef Jeremy Corbyn huet seng Néierlag schonn agestanen a virun der Press confirméiert, dass hien d’Partei net nach emol als Spëtzekandidat wéilt uféieren.

Labour huet nawell massiv u Stëmmen verluer.

Nodeems 649 vu 650 Walkreesser ausgezielt sinn, kommen déi Konservativ op 364 Sëtz, Labour op 203 an SNP op 48. Fir déi Konservativ ass dat e Plus vu 46 Sëtz, woubäi d'Labour-Partei 59 Sëtz verléiert. SNP kann e Plus vun 13 notéieren.

Dat Resultat féiert dann awer zu weideren inner-britesche Spannungen, well d’Schotten onbedéngt gär an der EU wëlle bleiwen. D’Cheffin vun der schottescher Nationalpartei SNP, d‘Nicola Sturgeaon huet schonns annoncéiert en zweeten Onofhängegkeets-Referendum wëllen ze lancéieren. D’SNP gouf massiv gestäerkt.

D'Diskussiounen mat London no engem Brexit wäerte komplizéiert ginn. Där Meenung ass d'Bundeskanzlerin Angela Merkel. Si sot dat beim Ofschloss vum EU-Sommet zu Bréissel. Et géif alles op eng "speziell Partnerschaft" tëscht London an der EU erauslafen. D'Negociatioune misste séier a präzis gefouert ginn. D'EU-Kommissiounspresidentin Ursula von Der Leyen gesäit et änlech wéi d'Angela Merkel a schwätzt och vun ambitiéisen Negociatiounen nom Brexit.

Reaktiounen

Xavier Bettel

"Et schéngt, wéi wann eng Majoritéit do ass, an dat ass dat wat wichteg ass!" dat war eng éischt Reaktioun op d'Walresultater aus Groussbritannien an der Nuecht op e Freideg vum Lëtzebuerger Premier Xavier Bettel um Bord vum EU Sommet. Et wier elo wichteg, datt ee weider kënnt.

De Xavier Bettel

D'géing elo alles drop hiweisen datt de Boris Johnson den Austrëtt aus der EU duerchzitt. Dat wier Schued, mä jo och hire Choix an op d'mannst wier et elo fäerdeg huet de Xavier Bettel nach betount.

"Mir brauche Groussbritannien a si si fir eist Land op ville Punkten e Partner", dat sot de Lëtzebuerger Premier Xavier Bettel um Enn vum leschten EU-Sommet vum Joer, bei deem et e Freideg ënnert anerem ëm de Brexit goung. Mat der Majoritéit vum Boris Johnson wier et elo un der Zäit ze liwweren, huet de Lëtzebuerger Premier betount. D'Diskussiounen zu Bréissel wäerten awer net méi einfach ginn.

Bei de Negociatiounen iwwert d'Handelsofkommes mat Groussbritannien géif Lëtzebuerg op konstruktiv Gespréicher setzen, seet de Premier Xavier Bettel. Et wier wichteg, datt Lëtzebuerg weider mat London schafft.

Xavier Bettel: "De But vu Lëtzebuerg ass elo net ze soen: 'London City muss futti gemaach ginn.' Verschidde Leit soen dat jo. Et ass wichteg, datt London och nach weider funktionéiere kann, datt ee kuckt, wou mer Brécke kënne bauen, mä datt mer Reegelen hunn, déi bei hinnen a bei eis zielen. Et kann net sinn, datt hir Reegele mat hire Produiten op eisem Marché sinn, dat geet net!"

Reaktioun vum Xavier Bettel / Rep. Claudia Kollwelter (13.12.19)

Et wier elo wichteg, datt een iwwert déi zukünfteg Relatiounen diskutéiert, seet de Xavier Bettel, deen drun erënnert, datt ee jo och eng Geschicht mat Groussbritannien huet.

Xavier Bettel: "An ech mengen, et ass wichteg, fir déi Relatioun ze halen an hinnen ze proposéieren, datt een en Echange huet, wou ee méi intensiv mat hinnen zesummeschaffe kann. Well et gëtt en 'pays tiers'."

Et hätt een sech eng Zäitschinn ginn an de Xavier Bettel hofft, datt een déi och respektéiert kritt.

Charel Michel

Den neie Rotspresident Charles Michel huet e Freideg virum Optakt vum 2. Dag vum EU-Sommet dem brittesche Premier Boris Johnson felicitéiert.

Reaktioun vum Charles Michel

Angela Merkel

D'Diskussioune mat London no engem Brexit wäerte komplizéiert ginn. Där Meenung ass d'Bundeskanzlerin Angela Merkel. Et géif alles op eng "speziell Partnerschaft" tëscht London an der EU erauslafen, et hätt een nom Brexit ee Konkurrent virun der Dier stoen. D'Negociatioune misste séier a präzis gefouert ginn.

Ursula von der Leyen

D'EU-Kommissiounspresidentin Ursula von der Leyen gesäit et änlech wéi d'Angela Merkel a schwätzt och vun ambitiéisen Negociatiounen nom Brexit. Den Austrëttsaccord soll elo séier a Groussbritannien an duerno am EU-Parlament ratifizéiert ginn, fënnt d'EU-Kommissiounspresidentin.

Ursula von der Leyen: "Die Zeit, die wir haben, ist extrem kurz. Nämlich von Februar bis Ende des Jahres, das sind gerade einmal 11 Monate. Deshalb setzen wir auch sehr klare Schwerpunkte auf die Themen, die so verhandelt werden müssen, dass wir am Ende des Jahres nicht wieder eine Situatioun eines 'Hard Brexits' haben."

Emmanuel Macron

Fir de franséische President Emmanuel Macron ass elo d'Zäit komm, fir Kloerheeten am Kader vum Brexit ze schafen. Hie géif sech wënschen, datt de Brexit-Accord esou séier wéi méiglech ratifizéiert gëtt.

Nathalie Lodhi

"D'Konsequenz vun de Wale kéint sinn, dass aus Great Britain méi e klengt Britain gëtt, mat méi Onofhängegkeet fir Schottland!", dat sot d'Nathalie Lodhi e Freideg am Nomëtten am RTL-Interview. D'Fra, déi fir eisen engleschsproochegen Internetsite RTLtoday schafft, wunnt zu Edinburgh an huet deemno mam schottesche Bléck op d'Wale vun en Donneschdeg a Groussbritannien gekuckt.

A Schottland ass een iwwerrascht iwwert dat däitlecht Resultat an déi "onerwaart riseg Majoritéit fir de Boris Johnson", déi wär quasi historesch. De brittesche Premier hätt e kloert Mandat kritt, fir de Brexit duerchzezéien. Fir d'schottesch Premierministesch Nicola Sturgeon schéngt et iwwerdeems e Mandat ze ginn, fir nees d'Onofhängegkeet ze froen.

Extrait Nathalie Lodhi

A Schottland hätt et kee Wëlle fir e Brexit ginn, soudass ëmmer de Risiko bestanen hätt, dass d'Vereenegt Kinnekräich dono net méi sou vereent wär, sou d'Nathalie Lodhi.