Extrem Wiederkonditiounen a wëllt Feier sinn an Australien keng Ausnam.

Mat 10 Milliounen Hektar, eng méi grouss Fläsch wéi Portugal, hunn d'Bëschbränn scho vill méi zerstéiert wéi an de Jore virdrun. Experte warnen, datt d'Bëscher den CO2, deen duerch d'Bränn ausgestouss gouf, anescht wéi virdrun, net méi ganz reabsorbéiere kënnen.

Zanter 1910 ass d'Klima an Australien ëm ee Grad méi waarm ginn. Fuerscher no hätt d'Heefegkeet an d'Längt vun extrem waarme Perioden doduerch zougeholl. Esou géifen d'Bëschbränn och méi intensiv ginn.

Esouwuel Wëssenschaftler wéi Pompjeeën an Noutdéngscht-Mataarbechter hunn dofir d'Regierung opgefuerdert, méi géint de Klimawandel ze maachen. Australien huet eng vun den héchsten Emissioune pro Kapp weltwäit.

De Premierminister Scott Morrison huet uganks refuséiert, eppes zum Klimawandel ze soen, seet awer mëttlerweil och, datt d'Äerderwiermung ee Faktor wier. Hie verdeedegt allerdéngs weiderhin eng Wirtschaftspolitik, déi staark op d'Kuelenindustrie opbaut. An engem Radiosinterview huet de Scott Morrison e Freideg behaapt, datt et lächerlech wier ze mengen, klimapolitesch Moossnamen hätten en direkten Impakt op d'Bränn.

Zéngdausenden Australier geet dat net duer. Si sinn e Freideg an e Samschdeg zu Sydney, Canberra a Melbourne op d'Stroosse gaangen, fir eng besser Klimapolitik an dem Scott Morrison säi Récktrëtt ze fuerderen.

Temperaturen zeréckgaangen, liichte Reen annoncéiert

D'Autoritéite warnen awer, datt d'Saison vun de Bëschbränn nach laang net eriwwer ass, an d'Situatioun nach eng laang Zäit ugespaant dierft bleiwen.

An Australien kënnen d'Pompjeeë liicht opootmen. D'Temperature sinn zeréckgaangen an et huet sech liichte Reen annoncéiert. Eng Woch laang sollen dës Wiederkonditiounen unhalen. Ma e Freideg nach war d'Situatioun alles aneschters wéi positiv. Do sinn an de Bundesstaaten New South Wales a Victoria zwee Bränn anenee gewuess, esou datt sech ee risegt Feier forméiert huet.

D'Autoritéite warnen, datt d'Saison vun de Bëschbränn nach laang net eriwwer ass, an d'Situatioun nach eng laang Zäit ugespaant dierft bleiwen. An Australien koum ee weidere Pompjee wärend de Buschbränn ëm d'Liewen. De Mann vu 60 Joer wier wärend sengem Asaz vun engem Bam erschloe ginn. Domadder klëmmt d'Zuel vun den Doudesaffer zanter Oktober op 27 Persounen.

E Sonndeg sinn d'Wiederkonditioune fir d'Läschaarbechte méi favorabel. D'Temperaturen si net méi esou héich, wéi nach virun e puer Deeg. Dobäi kënnt, datt et liicht ugefaangen huet mat reenen. D'Pompjeeë versiche vun dëser Situatioun ze profitéieren, fir d'Bränn besser ënnert Kontroll ze kréien.

Wéi et e Sonndeg de Moie fréi vun den australesche Pompjeeë geheescht huet, hätt een ee vun de risege Bränn mëttlerweil ënner Kontroll. Dee gouf nordwestlech vu Sydney entfacht, wéi ee Blëtz ageschloe war. Zanter Oktober hat sech d'Feier op enger hallwer Millioun Hektar breet gemaach. Entwarnung ginn d'Pompjeeën awer nach net, well d'Saison vun de Bränn nach net eriwwer ass.