D'Leit goufen opgeruff, hir Dieren a Fënsteren zouzeloossen, well de Risiko bestoung, datt schiedlech Stoffer an d'Loft komm sinn. Et gouf awer Entwarnung.

A Spuenien gouf et eng gréisser Explosioun an enger Industriezone. Zu Tarragona am Nordoste vum Land war eng déck Wollek iwwert der Stad an d'Autoritéiten haten d'Populatioun an enger éischter Phas opgeruff, bis op Weideres net erauszegoen an d'Fënsteren an d'Dieren zouzeloossen. Déi Warnung gouf an Tëschenzäit awer nees opgehuewen.

D'Explosioun war an enger petrochemescher Anlag an engem Chemiepark. Et géif keng Indice ginn, dass geféierlech Substanzen ausgetruede wieren. D'Feier wier mëttlerweil ënner Kontroll an déi gespaarte Stroosse sinn och nees fir de Verkéier opgemaach ginn, heescht et vun den Autoritéiten.

Vun de katalanesche Regionalpompjeeën heescht et, bei der Explosioun selwer wieren op d'mannst 4 Persoune blesséiert ginn. Méi spéit en Dënschdeg den Owend koum d'Confirmatioun, dass eng Persoun ëm d'Liewe komm wier.

Wisou et zu der Explosioun komm ass, ass aktuell nach net gewosst.