A senger Ried huet de russesche President Wladimir Putin ënner anerem annoncéiert, datt hien d'Verfassung ännere wéilt.

A senger Ried zur Lag vun der Natioun sot de Putin, dass an Zukunft déi russesch Verfassung iwwert den internationalen Accorde soll stoen. Hie géif d'Vollek an engem Referendum ëm seng Meenung froen. An engems wëll de Putin, dass d'Parlament an Zukunft d'Decisioun hëlt, wie Premierminister gëtt.

Wéi russesch Medie mellen, wier no dëser Ried déi komplett russesch Regierung zeréckgetrueden. De Medwedew soll dann och schonn en neie Posten hunn, well de Putin hien als Vize-Chef vum Nationale Sécherheetsrot proposéiert huet.

Déi demissionär Regierung soll awer nach am Amt bleiwen, bis eng Nei steet. Ma mam Récktrëtt wéilt d'Regierung dem President all d'Méiglechkeete ginn, fir déi erfuerderlech Moossnamen an d'Weeër ze leeden, huet de Medwedew erkläert.

Am Laf vum Dag huet de Wladimir Putin de Chef vun der nationaler Steieragence Michail Mischustin als neie Premier virgeschloen.